ShYU-nyń Ekonomıkalyq qylmystarmen kúres jónindegi organyn qurý qajet - S.Jeenbekov
"Ádette ekonomıkalyq qylmystar transulttyq sıpatta bolady. Olar esirtki saýdasymen, kontrabandamen, qylmystyq jolymen alynǵan kiristi jylystatýmen tyǵyz baılanysty. Sońynda olar memleket qaýipsizdigi úshin qater tóndiredi. Qyrǵyz tarapy ShYU-nyń ekonomıkalyq qylmystarmen kúres jónindegi organyn qurýdy usynady", - dedi Qyrǵyz Prezıdenti.
Osy rette S.Jeenbekov qazirgi zamanda ınternet keńistikte tarap jatqan syn-qaterler memleket qaýipsizdigi úshin shynaıy qater bolyp otyrǵanyn basa aıtty.
"Tekserilmegen, tipti kóbine qasaqana jalǵan aqparattardyń taralýy jıilep ketip, teris áser qalyptastyryp otyr. Qylmystyq, lańkestik jáne áskerı-saıası maqsattarǵa ІT-tehnologııalardy paıdalaný qaýpi kúsheıe túsýde. Osyǵan oraı aqparattyq qaýipsizdikti qamtamasyz etý - ShYU kúntártibindegi mańyzdy máselege aınalýy tıis dep sanaımyz", - dedi ol.
Qyrǵyz Prezıdenti tsıfrlandyrý, aqparattyq-kommýnıkatsııalyq tehnologııalar salasyndaǵy ózara is-qımyl, óńiraralyq yntymaqtastyq júıesin qalyptastyrý mańyzdy ekendigin atap ótti.
"ShYU-ǵa múshe memleketterdiń birqatarynda bul salada jınaqtalǵan mol tájirıbe bar", - dedi S.Jeenbekov.
Jıynǵa Qazaqstan Prezıdenti Qasym-Jomart Toqaev, Úndistan Premer-Mınıstri Narendra Modı, QHR Tóraǵasy Sı Tszınpın, Reseı Prezıdenti V.Pýtın, Pákistan Premer-Mınıstri Imran Han, Ózbekstan Prezıdenti Sh. Mırzıeev, Tájikstan Prezıdenti E.Rahmon qatysyp otyr. Munan bólek, baıqaýshy elderden Aýǵanstan Prezıdenti A.Ganı, Belarýs Prezıdenti A.Lýkashenko, Iran Prezıdenti H.Rýhanı, Mońǵolııa Prezıdenti H.Battýlga keldi.
Foto: kg.akipress.org