ShYU-ny eń salmaqty dıalog alańy dep baǵalaýǵa bolady - sarapshy
«Shanhaı yntymaqtastyq uıymy búgingi tańda jadpy bizdiń aımaǵymyzda qaýipsizdik salasynda úlken ról oınaıtyn faktor. Aımaqtyq qaýipsizdikti qamtamasyz etý boıynsha jetekshi róldegi uıymdardyń biri jáne Qazaqstan múshe bolǵannan bastap bul uıymda belsendi is-qımyldardy atqaryp kele jatyr. Biz úshin bul tek qaýipsizdik salasynda ǵana emes, sonymen birge ekonomıkalyq baǵytta yntymaqtastyqty nyǵaıtýǵa múmkindik beretin úlken alańdardyń biri. ShYU qatary keńeıgenin bilesizder, búgingi tańda álemdik ári Eýrazııanyń eń iri derjavalaryn biriktiretin uıym bolyp otyr. Sebebi Qyıtaı men Reseıden bólek, ótken jyly Úndistan da múshe boldy. Jańadan qosylǵan elder (Úndistan men Pákistan) Qazaqstandaǵy sammıt kezinde múshelikke kirdi», - dep toqtaldy sarapshy QazAqparatqa bergen suhbatynda.
Ekonomıkalyq áleýeti men saıası yqpaly boıynsha ShYU-ny Eýrazııadaǵy eń salmaqty dıalog alańdardyń biri dep baǵalaýǵa bolady. Bul turǵyda Jumabek Sarabekov Qazaqstan bolashaǵy úshin ShYU aıasynda árqashanda belsendi, konstrýktıvti ról oınaýǵa mán berip otyrǵandyǵyn atap ótti.
«Sondaı-aq biz bul uıymnyń barlyq músheleriniń múddesin eskerip, qaýipsizdik salasyndaǵy, ekonomıka salasyndaǵy músheler arasyndaǵy dıalogtyń kúsheıgenin qalaımyz. Sáıkesinshe, osy baǵyttaǵy jumystarǵa únemi nazar aýdaryp jatyrmyz», - dedi ol.
Sarapshy, bıyl maýsym aıynda Tsındao qalasynda (QHR) ShYU sammıti ótetinin eske saldy. «Osy oraıda qaýipsizdik máselesi kún tártibinde mindetti túrde talqylanady. ıAǵnı Taıaý Shyǵystaǵy máseleni eskersek, odan bólek Aýǵanstandaǵy ishki saıası jaǵdaıdaǵy qıyndyqtardy nazarǵa ala otyryp, osy másele óziniń ózektiligin baıqatyp otyr. Sonymen qatar búginde álemdegi syn-qaterlerge qatysty jańa ıdeıalar aıtylady degen oıdamyn. Munymen qosa, uıymnyń ekonomıkalyq baǵyty boıynsha tyń ıdeıalar talqylanady jáne bul jerde Qytaıdyń «Bir beldeý, bir jol» bastamasy ShYU-nyń ustanyp otyrǵan ekonomıkalyq maqsattarymen uqsas. Osy oraıda ózara qoldaý kórsetilýi múmkin», - dedi Jumabek Sarabekov.
Onyń paıymynsha, ShYU negizinde Únidistan pen Pákistannyń músheligin ary qaraı keńeıtý boıynsha túrli bastamalar aıtylýy yqtımal. Odan bólek, ekonomıkalyq baǵytta Eýrazııalyq ekonomıkalyq odaq pen Qytaıdyń «Bir beldeý, bir jol» strategııasyn ushtastyrý turǵysynda pikirler aıtylyp jatyr. Sondyqtan osy baǵytta da tıisti usynystar jasalýy múmkin.
Qazaqstan men Qytaıdyń yntymaqtastyǵyna toqtalǵan J. Sarabekov, Elbasy Nursultan Nazarbaev pen QHR Tóraǵasy Sı Tszınpın arasynda da tatý kórshi elderge tán baılanystar jalǵasyp kele jatqanyn sóz etti.
«Eki saıası kóshbasshy Qazaqstan men Qytaı arasyndaǵy áriptestiktiń strategııalyq deńgeıine únemi ekpin qoıyp otyrady. Sondyqtan eki el memleket basshylary Astana men Beıjiń arasyndaǵy dıalogty kúsheıtýge naqty qadamdar jasap jatyr. Atap aıtqanda, ınvestıtsııany arttyrý, Qazaqstan taýarlaryn Qytaı naryǵyna keńirek shyǵarý baǵytynda kóptegen jobalar bar. Jalpy osy salada qos tarap ta jumystardy jalǵastyrýǵa múddeli bolyp otyr», - dep túıdi sarapshy.
Esterińizge sala keteıik, 2017 jyldyń maýsymynda jahan nazaryn Astanaǵa aýdarǵan aıtýly shara - Qazaqstan Prezıdenti Nursultan Nazarbaevtyń tóraǵalyǵymen Shanhaı yntymaqtastyq uıymyna múshe memleketter basshylary keńesiniń otyrysy ótti.
Sarapshylar «tarıhı sammıt» dep baǵalaǵan ShYU-nyń dál osy Astana sammıtinde Úndistan men Pákistan elderi uıymǵa tolyqqandy múshe bolyp qabyldandy. Aıta keterligi, qol qoıý rásimine Úndistan Premer-Mınıstri Narendra Modı men Pákistan Islam Respýblıkasynyń Premer-Mınıstri Mýhamad Navaz Sharıf qatysty.