ShYU-ny 2025 jylǵa deıin damytý strategııasyn ázirleý mindeti tur - K. Másimov
ASTANA. QazAqparat - ShYU-nyń 2025 jylǵa deıin damytýdyń strategııasy qazirgi zamanǵy syn-qaterlerge der kezinde is-qımyl jasaýǵa qaýqarly etedi.
Bul týraly búgin elordadaǵy Táýelsizdik saraıynda Shanhaı yntymaqtastyq uıymyna múshe memleketterdiń Úkimet basshylary keńesiniń keńeıtilgen otyrysynda QR Premer-Mınıstri Kárim Másimov málim etti.
ShYU óziniń budan ary qaraı damýynyń joldaryn izdestirip jatqandyǵyna toqtalǵan K. Másimov, «osyǵan baılanysty bizdiń aldymyzda ShYU-ny 2025 jylǵa deıin damytýdyń strategııasyn ázirleý boıynsha keshendi jumysty júrgizý mindeti tur. Bul óz kezeginde uıymnyń áleýetin ashyp, ony qýatyn arttyryp, qazirgi zamanǵy syn-qaterlerge der kezinde is-qımyl jasaýǵa qaýqarly etedi. Osy arqyly uıym qyzmetine serpin bere alamyz»,-dedi.
Premer-Mınıstrdiń aıtýynsha, ShYU-ny damytý strategııasyn bekitý josparyn eskere otyryp, kópjaqty saýda-ekonomıkalyq yntymaqtastyq baǵdarlamasyn oryndaý boıynsha qoldanystaǵy sharalar josparyn túgendeý qajettiligi, sondaı-aq 2017-2021 jyldarǵa ShYU aıasynda jobalyq qyzmetti ary qaraı damytý boıynsha sharalar tizbesin ázirleý máselesi kelisildi.
Úkimet basshysynyń sózine qaraǵanda, otyrys qorytyndysy boıynsha tıisti mınıstrlikterge kelesi otyrystyń qarsańynda atalǵan qujattardyń jobasyn daıarlaý tapsyrmasy beriledi.
