ShYU múshe-memleketteri Qaýipsizdik keńesteriniń hatshylary kezdesti
2022 jylǵy 19 tamyzda Tashkentte Shanhaı Yntymaqtastyq Uıymyna múshe memleketterdiń Qaýipsizdik keńesteri hatshylarynyń on jetinshi kezdesýi ótti, oǵan Qazaqstan Respýblıkasy Prezıdentiniń kómekshisi – Qaýipsizdik Keńesiniń Hatshysy Ǵızat Nurdáýletov qatysty.
Іs-shara barysynda ShYU keńistiginde qaýipsizdik pen turaqtylyqty qamtamasyz etý salasyndaǵy ahýalǵa baılanysty kóptegen máseleler talqylandy.
Taraptar terrorızmge, separatızm men ekstremızmge, qarý-jaraq pen esirtkiniń zańsyz aınalymyna, transulttyq uıymdasqan qylmysqa qarsy is-qımyl, halyqaralyq aqparattyq qaýipsizdikti qamtamasyz etý sııaqty salalardaǵy yntymaqtastyqty odan ári damytýdyń negizgi aspektileri boıynsha pikir almasty.
Kezdesý barysynda Aýǵanstandaǵy ahýaldy tezirek retteý – ShYU aımaǵynda beıbitshilik pen qaýipsizdikti saqtaýdyń negizgi faktorlarynyń biri ekeni atap ótildi. Taraptar bul eldiń táýelsiz, birtutas, demokratııalyq, beıbit jáne terrorızmnen, soǵystan, esirtkiden ada memleket retinde qalyptasýyn qoldady.
Ǵızat Nurdáýletov áriptesterine ShYU qyzmetiniń mańyzdy baǵyttary boıynsha Qazaqstannyń ustanymyn jetkizdi jáne elimizdiń múddelerin eskere otyryp, Uıymnyń odan ári úılesimdi damýy jóninde birqatar usynystar aıtty.
Qazaqstan Respýblıkasy Prezıdentiniń kómekshisi – Qaýipsizdik Keńesiniń Hatshysy BUU maquldaǵan Ortalyq Azııa men Aýǵanstan úshin ornyqty damý maqsattary boıynsha Almatyda BUU Ortalyǵyn qurý jónindegi Qazaqstannyń bastamasyn birlesken qoldaýdyń erekshe ózektiligin atap ótti.
Otyrys qorytyndysy boıynsha is-sharaǵa qatysýshylar tıisti Hattamaǵa qol qoıdy. ShYU-ǵa múshe memleketterdiń Qaýipsizdik keńesi hatshylarynyń kelesi kezdesýin Úndistan Respýblıkasynda ótkizý jóninde sheshim qabyldandy.
Sonymen qatar, kezdesý barysynda Ǵızat Nurdáýletov Ózbekstan Respýblıkasy Prezıdenti janyndaǵy Qaýipsizdik Keńesiniń Hatshysy Vıktor Mahmýdovpen, Reseı Federatsııasy Qaýipsizdik Keńesiniń Hatshysy Nıkolaı Patrýshevpen, Pákistan Islam Respýblıkasy Ulttyq qaýipsizdik bóliminiń Hatshysy Aamır Hasanmen jáne Mońǵolııa Ulttyq Qaýipsizdik Keńesiniń Hatshysy Jadambyn Enhbaıarmen kelissózder júrgizdi. Óńirlik qaýipsizdik salasyndaǵy ózara is-qımyl men yntymaqtastyqty keńeıtýdiń ózekti máseleleri qarastyryldy.
Foto: akorda.kz
