ShYU mıssııasy saılaýdy baıqaýdy qazaqstandyq zańnama aıasynda jáne halyqaralyq ólshemder negizinde júrgizedi
Kezdesý barysynda Ortalyq saılaý komıssııasynyń basshysy Q.Turǵanqulov A.Nosırovke komıssııasynyń Qazaqstan Respýblıkasy Parlamenti Májilisiniń depýtattaryn jáne máslıhattarynyń depýtattaryn saılaýdy ázirleý men ótkizý jónindegi jumysymen tolyq tanystyrdy.
«Elektorattyq naýqan kezeńderi zańnamada kózdelgen tártipte ótýde. 18 naýryz kúni saǵat 24:00-de saıası partııalar men máslıhattar depýtattyǵyna kandıdattardyń saılaý aldyndaǵy úgiti aıaqtalady. BAQ-qa monıtorıngtiń aldyn ala qorytyndylary kórsetkendeı, tutas alǵanda biz saılaýǵa qatysýshy saıası partııalardyń barlyǵyna buqaralyq aqparat quraldaryna teń qol jetkizýin qamtamasyz ete aldyq. Keshe, Ortalyq saılaý komıssııasy bekitken reglamentke sáıkes alty saıası partııa teledıdarlyq pikirsaıysqa qatysty. Úgittik jumystyń mundaı nysany saılaý týraly zańda kózdelgen» - dedi Q.Turǵanqulov.
Óz kezeginde Qazaqstan Respýblıkasy Parlamenti Májilisiniń depýtattaryn saılaýdy baıqaý jónindegi ShYU mıssııasynyń basshysy uıymnyń bedeldi múshesi bolyp tabylatyn Qazaqstandaǵy saılaýǵa monıtorıng júrgizýge belsendi qatysýǵa nıet bildirdi.
A.Nosırov sondaı-aq saılaýdy uıymdastyrý deńgeıine jáne qazaqstandyq BAQ-tyń saılaý naýqany kezindegi qyzmetine baǵa berdi.
«Biz daıyndyq rásimderiniń mańyzdylyǵy men muqııattylyǵyn atap óttik. Bizdiń mıssııa saılaýdy baıqaýdy qazaqstandyq zańnama aıasynda jáne halyqaralyq ólshemder negizinde júrgizedi» - degen ol kezdesý sońynda Ortalyq saılaý komıssııasyna jáne Qazaqstandaǵy saılaýdy uıymdastyrýshylardyń barlyǵyna sáttilik tiledi.
Kezdesýge sondaı-aq Shanhaı Yntymaqtastyǵy Uıymy hatshylyǵynyń bas sarapshysy M.Aseıınov qatysty.
