ShYU memleketteriniń áskerı qyzmetshileri «Beıbit mıssııa» jattyǵýy ótkiziletin oryndarǵa barýda

ASTANA. QazAqparat - ShYU-ǵa múshe memleketteriniń «Beıbit mıssııa» birlesken lańkestikke qarsy komandalyq-shtabtyq oqý-jattyǵýyna daıyndalý sheńberinde Qytaı ult-azattyq áskeriniń bólimsheleri QR aýmaǵy arqyly temirjol eshelonymen Reseı Federatsııasy, Chelıabi oblysynyń Shubarkól polıgonyna baratyn bolady, dep habarlaıdy Qorǵanys mınıstrliginiń baspasóz qyzmeti.

Júrý baǵyty Dostyq-Aqtoǵaı-Aıagóz-Aýyl-Lokot marshrýty, ári qaraı Reseı Federatsııasynyń aýmaǵy arqyly ótedi. QHR-dyń eshelondaryna Qazaqstan Respýblıkasynyń búkil aýmaǵynda «Shyǵys» óńirlik qolbasshylyǵynyń qaraýyly erip júredi.

 Budan buryn habarlanǵandaı, «Beıbit mıssııa» oqý-jattyǵýyna ShYU Úndistan, Qazaqstan, Qyrǵyzstan, Qytaı, Pákistan, Reseı, Tájikstan jáne Ózbekstan memleketteri qarýly kúshteriniń 3 myńnan asa áskerı qyzmetshisi jáne 500-den asa birlik qarý-jaraq pen áskerı tehnıka tartyldy. Oqý-jattyǵýda lańkesterdiń bılikti nemese memleketterdiń biriniń aýmaq bóligin basyp alýy jaǵdaıynda qatysýshy elder qarýly kúshteriniń birlesken is-qımyldaryn pysyqtaý qarastyrylǵan. QR Qarýly Kúshteriniń eshelondaryn  18 tamyzda oqý-jattyǵýdyń ótkizilý ornyna jiberý josparlanýda.