«ShYU Kýbogy» fýtbol týrnırinde Qazaqstan ekinshi oryn aldy (FOTO)

BEIJІŃ. QazAqparat - Beıjińde Qazaqstannyń Shanhaı yntymaqtastyq uıymyna (ShYU) tóraǵalyǵy aıasynda Uıymnyń 15 jyldyǵyna oraı, «ShYU Kýbogyna» fýtboldan joldastyq kezdesý ótti.

Oǵan ShYU hatshylyǵynyń, QHR SІM jáne uıymǵa múshe memleketterdiń QHR-daǵy elshilikteriniń komandalary qatysty.

Sharanyń ashylý saltanatynda QHR ShYU isteri boıynsha ulttyq úılestirýshi Pıao ıAnfan: «dál qazir Rıo-de-Janeıroda jazǵy Olımpıada oıyndary ótip jatsa, Beıjińde mańyzdylyǵy bir mysqal da kem emes «ShYU Kýbogyna» fýtbol oıyndary ótip jatyr. Jáne bul oıyndardyń eń basty qorytyndysy, ShYU-ǵa múshe memleketter arasyndaǵy dostyqtyń nyǵaıýy bolmaq», - dedi.
Sóz sońynda qytaılyq dıplomat fýtbol komandalaryna sáttilik tiledi.
Tartysty oıynda birinshi oryndy QHR-daǵy Reseı elshiligi ıelendi. Ekinshi jáne úshinshi oryndar QHR-daǵy Qazaqstan elshiligi men QHR Syrtqy ister mınıstrligine buıyrdy.
Arnaıy júldeder men estelik kádesyılar oıyn tóreshilerine de berildi. Sondaı-aq, oıynshylar «Úzdik oıynshy» (RF elshiligi quramasynyń ókili), «Úzdik shabýylshy» (QR elshiligi quramasynyń ókili), «Úzdik qaqpashy» (RF elshiligi quramasynyń ókili), «Úzdik kapıtan» (QR elshiligi quramasynyń ókili), «Úzdik qorǵaýshy» (QHR SІM quramasynyń ókili) jáne «Úzdik oıyn úshin» (ShYU hatshylyǵy quramasynyń ókili) nomınatsııalary boıynsha marapattaldy.