ShYU keńsesindegi qytaılyq kallıgrafııa baıqaýynda qazaqstandyqtar top jardy

BEIJІŃ. QazAqparat - Shyǵys Qytaı pedagogıkalyq ýnıversıtetiniń (Shanhaı) stýdenti Dana Toıbaǵarova jáne Qytaı munaı ýnıversıtetiniń (Tsındao) ekinshi kýrs magıstranty Erǵalı Saıanuly Shanhaı yntymaqtastyq uıymy elderi arasynda ótken «Gochjen Kýbogy» qytaılyq kallıgrafııa baıqaýynda birinshi oryn aldy, dep habarlaıdy QazAqparat agenttiginiń Qytaıdaǵy menshikti tilshisi.

Ekinshi oryn da qazaqstandyq Rýslan Tólenovqa buıyrdy. Úshinshi oryndy Qytaı pedagogıkalyq ýnıversıtetiniń stýdenti Mádına Balaǵulova jeńip aldy.

«Men «Hımııalyq ınjenerııa jáne tehnologııa» mamandyǵynyń magıstrantymyn. Bakalavr dárejesin Qanysh Sátpaev atyndaǵy Qazaq ulttyq tehnologııalyq ýnıversıtetinde alǵanmyn. Qazaqstanda Konfýtsıı ınstıtýtyna jıi baratynmyn. 9-10 maýsym kúnderi Tsındao qalasynda ótetin ShYU sammıtine volonterlyqqa jazylyp qoıdym. Eger meni qabyldasa, sammıtke qatysa alamyn», - dedi Erǵalı Saıanuly QazAqparat tilshisine bergen suhbatynda.

Baıqaýdy «Jenmın hýabao» baspasy men Qytaı aqparattyq ınternet-ortalyǵy qytaı mádenıetin nasıhattaý maqsatynda uıymdastyrǵan. Oǵan Qazaqstan, Qyrǵyzstan, Tájikstan, Ózbekstan, Reseı, Belarýs, Úndistan, Pákistan, Ázerbaıjan, Armenııa, Kambojda, Shrı-Lanka elderinen 40-qa jýyq adam qatysty.

Qytaılyq kallıgrafııa - ıeroglıfterdi áserli etip jazý óneri. Shyǵysta kallıgrafııaǵa erekshe mán bergen jáne bul jumys adamnyń rýhanı damýyna yqpal etedi dep sanaǵan.