ShYU Qazaqstandaǵy saılaýǵa qatysty málimdeme jasady
Astanada ótken arnaıy brıfıngte uıymnyń bas hatshysy Dmıtrıı Mezentsevtiń ózi sóz sóıledi. Onyń aıtýynsha, mıssııa bes baǵyt boıynsha jumys jasaýda. ShYU mindetti túrde Astanadaǵy saılaý ýchaskelerinde bolýdy sheshti. Sonymen birge baıqaýshylardyń bir bóligi Almatyda, kelesi bóligi Kókshetaý, Qaraǵandy jáne Shymkentte jumys atqaryp jatyr.
"Biz bir-birimizben habarlastyq. Bizde, barlyǵymyzda ortaq pikir qalyptasty. Saılaý óte joǵary deńgeıde uıymdastyrylǵan jáne barlyǵy qalypty, tynysh ótýde", - dedi ol.
Saılaý ýchaskelerinde bolǵan ShYU ókilderi halyqtyń joǵary elektoraldy belsendiligin atap ótýde.
"Biz kóp saýaldar tastadyq. Ulttyq zańnama talaptaryna saı ótip jatqanyna taǵy bir ret kóz jetkizdik. Saılaý komıssııasy quramyndaǵy qyzmetkerler kásibı turǵyda daıyndalǵan mamandar", - deıdi D. Mezentsev.
Onyń aıtýynsha, saılaý ýchaskelerinde qart kisilerge, Uly Otan soǵysynyń ardagerlerine jasalǵan jaǵdaı óte joǵary deńgeıde boldy. Jastarǵa da úlken mán berilgen.
"Biz jastardyń saılaý ýchaskelerine kóptep kelip jatqanyn kórdik. Árıne, biz kim qandaı úmitkerge daýys bergenin suraı almaımyz. Biraq biz olardyń saılaýǵa qandaı kóńil-kúımen kelgendikterin suradyq. Olar óz memleketiniń búgingi ómirine jáne bolashaǵyna búgin jaýapty ekendikterin túsinedi. Bul óte mańyzdy", - dep túıdi sózin ShYU basshysy.