ShYU hatshylyǵynda Qazaqstannyń mádenı kúnderi ótti
ASTANA. QazAqparat - Búgin Shanhaı yntymaqtastyq uıymy hatshylyǵynda Qazaqstannyń mádenı kúnderi ótti, dep habarlaıdy QazAqparattyń Qytaıdaǵy arnaýly tilshisi Sadyq Ákejanov.
Sharaǵa Qytaıdyń mádenıet mınıstri Dın Veı, QHR SІM Shyǵys Eýropa jáne Ortalyq Azııa departamentiniń basshylyǵy, sonymen qatar Qytaıda akkredıttelgen ShYU-ǵa qatysýshy elderdiń dıplomatııalyq ókildikteriniń basshylary qatysty.
«ShYU-nyń shtap-páteriniń aýlasyndaǵy jasyl alańqaıda alǵash ret qazaq kıiz úı ornatyldy. Bul tamyry ǵasyrlar qoınaýyna ketken qazaq halqynyń salt-dástúrine degen qurmet. Búgingi Qazaqstan ónerdiń barlyq baǵytynda ósip-órkendegen, qazaqstandyq oryndaýshylar halyqaralyq tasymaldyqqa ıe bolǵan», - dep atap ótti ShYU Bas hatshysy Rashıd Alımov.
Ol ShYU-ǵa tóraǵalyq etip otyrǵan Qazaqstannyń mádenı kúnderi QR Táýelsizdiginiń 25 jyldyq, ShYU-nyń 15 jyldyq mereıtoıy aıasynda ótip otyrǵandyǵyn basa aıtty.
Qazaqstannyń QHR-daǵy Tótenshe jáne Ókiletti Elshisi Shahrat Nuryshev Táýelsizdik jyldary ishinde Qazaqstannyń áleýmettik-ekonomıkalyq negizgi jetistikterine toqtalyp ótti. Elimizdiń mádenı damýy jaıynda sóz qozǵap, Qazaqstannyń óńirlik jáne jahandyq problemalardy sheshýdegi róline toqtaldy.
«QR Prezıdenti Nursultan Nazarbaevtyń tapsyrmasymen iske qosylǵan memlekettik baǵdarlamalardyń arqasynda eldiń tarıhı-mádenı murasy júıelendirilip, keńinen aınalymǵa engizildi. Tarıhı jáne mádenı eskertkishter túgendelip, qaıta jańǵyrtyldy. Mádenı muralardyń ınfraqurylymy keńeıtilip, túrli beıindegi teatrlar ashyldy, kóptegen mýzeıler, joǵary kásibı shyǵarmashylyq jáne mýzykalyq ujymdar quryldy kınoındýstrııa men kitaphana salasy damydy. Munyń barlyǵy da qazaqstandyq mádenıettiń álemdik «vızıtkalyq kartasyna» aınaldy», - dedi ol.
Qytaı Mádenıet mınıstriniń orynbasary Dın Veı óz sózinde Qazaqstandy Jibek jolynyń marjany dep atap ótti.
