ShYU-ǵa tóraǵalyq Qazaqstannan Qytaıǵa ótedi

ASTANA. QazAqparat - Qazaqstan men Qytaı arasynda ortaq sheshimin tappaǵan másele joq. Búgin Aqordada elimizge resmı saparmen kelgen QHR Tóraǵasy Sı Tszınpınmen shaǵyn jáne keńeıtilgen quramdaǵy kelissózderden keıingi birlesken málimdeme barysynda Elbasy Nursultan Nazarbaev osylaı málim etti, dep habarlaıdy QazAqparat.

«Elimizge resmı saparmen kelgen QHR Tóraǵasy Sı Tszınpın myrzamen búgin Astanada kelissózder júrgizip,  kezdeskenimizge  óte qýanyshtymyz. Bul  kezdesý Qazaqstan men Qytaı arasyndaǵy dıplomatııalyq  qarym-qatynastyń 25 jyldyq  merekesine saı kelip otyr. Osyndaı az ǵana kezeńniń  ishinde saıası yqpaldastyǵymyz tek qana  órleý baǵytynda.  Shynyn aıtqanda, eki aradaǵy qarym-qatynas eń tómengi kórsetkishten joǵary kórsetkishke deıin ósti, órkendedi. Ártúrli jaǵdaıdaǵy basqosýlarda ózara belsendi qımyl júrgizip kelemiz. Búginde elderimizdiń ekonomıkalyq yntymaqtastyǵy  damyp, joǵarylaı túsýde. Aramyzda ortaq sheshimin tappaǵan máseleler joq. Eki memlekettiń arasyndaǵy qatynastar tıimdi seriktestiktiń dúnıedegi úlgisi bolyp tabylady», - dedi Nursultan Nazarbaev.

Memleket basshysy shaǵyn jáne keńeıtilgen quramda qytaılyq áriptesimen mazmundy  kelissózder júrgizgenin, barlyq mańyzdy máselelerde ózara túsinistikke qol jetkizgendikterin basa aıtty.

«Biz elderimizdiń ShYU aıasyndaǵy ózara is-qımylynyń joǵary deńgeıin atap óttik. QHR Tóraǵasynyń bul ıdeıasy osy jerde, Nazarbaev Ýnıversıtetinde alǵash ret jarııa etilgen edi. Astana sammıtinen keıin ShYU-ǵa tóraǵalyq Qazaqstannan Qytaıǵa ótedi. Bul oqıǵa uıym úshin mańyzdy sátte oryn alýda. Erteń músheler quramy eki mańyzdy múshemen tolyǵady. Olar: Úndistan  jáne Pákistan. Osylaısha, ShYU jer turǵyndarynyń 40 paıyzyn, álem ekonomıkasynyń shamamen úshten birin qamtıtyn bolady. Sondyqtan ózimizdiń tóraǵalyǵymyzdy qytaıǵa bere otyryp, qytaılyq dostarymyzǵa tabystar tileımiz», - dedi Qazaqstan Prezıdenti.