ShYU-ǵa múshe memleketter sanynyń artýynan esh qaýip joq
«ShYU jalpy tanylǵan jáne bedeldi jan-jaqty birlestik retinde quryldy. Eýrazııalyq keńistikte ShYU qaýipsizdik pen turaqtylyqty qamtamasyz etýdiń basty tetikteriniń biri sanalady. Uıym jumys istep turǵan jyldardyń ishinde Shanhaı dıalogyna qatysýshylar ózekti syn-qaterlerge birlesip qarsy turýdyń tıisti alańyn qura aldy», - dedi ol.
Sonymen qatar ol ShYU qyzmetindegi ekonomıkalyq baǵyt ta tabysty damyp kele jatqandyǵyn atap ótti. Mádenı-gýmanıtarlyq salamen qatar saýda-ekonomıkalyq yntymaqtastyqtyń da nyǵaıa túsýi ShYU memleketteri men olardyń halyqtarynyń ózara is-qımylynyń úlken áleýetin ashatyndyǵyn aıtty.
«Shanhaı uıymynyń damý tarıhynda Úndistan men Pákistan bizdiń uıymymyzdyń tolyqqandy múshesi bolyp qabyldanǵan Astana sammıtiniń tarıhı mánin basa atap ótken jón. ShYU-nyń alǵash ret keńeıý úrdisi uıymnyń yntymaqtastyǵyn tereńdetip, áleýetin arttyrý úshin mańyzdy serpin boldy. «Qatysýshylar sanynyń artýy ShYU-daǵy kelisimge kelý jáne sheshimder qabyldaý úrdisin qıyndatady» dep jıi aıtylatyn qaýipter obektıvti sıpatqa ıe jáne bul táýekelderdi eskerýimiz qajet», - dedi E.Saltybaev.
Instıtýt dırektorynyń atap ótýinshe, «shanhaı rýhy» negizindegi yntymaqtastyqty damytý ózara senimdi arttyra túsedi.
«Birige otyryp damýǵa umtylý ortaq kúntártipte turǵan, tipti, eń kúrdeli máselerdiń de sheshimin tabýǵa múmkindik beredi», - dep túıindedi sózin ınstıtýt basshysy.
Forým jumysyna Qytaı, Reseı, Úndistan, Pákistan, Iran, Aýǵanstan, Belarýs jáne Ortalyq Azııa memleketterinen kelgen delegattar qatysýda.
Aıta keterligi, osy jyldyń maýsym aıynda Qytaıdyń Tsındao qalasynda ótetin ShYU sammıtine Elbasy Nursultan Nazarbaev qatysady dep kútilýde.