ShYU-ǵa múshe memleketter ekstremızmge qarsy kúreste ózara is-qımyldy qalyptastyrady

NUR-SULTAN. QazAqparat – Parlament Senatynyń Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysynda «Shanhaı yntymaqtastyq uıymynyń ekstremızmge qarsy is-qımyl jónindegi konventsııasyn ratıfıkatsııalaý týraly» zań jobasy qaraldy, dep habarlaıdy QazAqparat tilshisi.

Konventsııaǵa Shanhaı yntymaqtastyq uıymyna múshe memleketterdiń basshylary 2017 jylǵy maýsymda Nur-Sultan qalasynda qol qoıǵan. Qujattyń maqsaty – ShYU-ǵa múshe elderdiń ekstremızmge qarsy is-qımyl salasynda ózara árekettestiginiń tıimdiligin arttyrý.

QR Ulttyq qaýipsizdik komıteti tóraǵasynyń orynbasary Nurǵalı Bilisbekovtiń aıtýynsha, konventsııa ekstremızm túsinigin tuńǵysh ret halyqaralyq deńgeıde destrýktıvti kórinis retinde belgileıdi, onyń mazmuny men ekstremıstik is-árekettiń negizgi túrlerin anyqtaıdy. Qujat ShYU-ǵa múshe memleketterdiń ekstremızmge qarsy kúres salasynda ózara is-qımylyn qalyptastyrady.

Konventsııany iske asyrý: ShYU elderiniń aýmaǵyna ekstremıstik uıymdardyń múshelerin kirgizbeý úshin shekaralyq yntymaqtastyqty kúsheıtýge; ekstremızmge qarsy sharalar ázirleý men iske asyrýda halyqaralyq jáne óńirlik uıymdarmen ózara is-qımyldy arttyrýǵa; ekstremızmge qarsy is-qımyldyń nasıhattalýyn, sonyń ishinde BAQ pen ınternet jelisinde kúsheıtýge; ekstremıstik ıdeologııanyń taralýyn ýaqtyly anyqtaý men jolyn kesý maqsatynda monıtorıng júrgizýdi jetildirýge múmkindik beredi.

Talqylaýdan keıin komıtet músheleri zań jobasyn Parlament Senaty jalpy otyrysynyń qaraýyna shyǵarý týraly sheshimdi qabyldady.