ShYU-ǵa múshe elderdiń áskerı qyzmetkerleri yntymaqtastyq máselesin talqylady

ASTANA. QazAqparat - Qazaqstan Qarýly Kúshteriniń Ulttyq áskerı-patrıottyq ortalyǵynda Shanhaı yntymaqtastyq uıymyna (ShYU) múshe memleketter Qorǵanys mınıstrlikteriniń halyqaralyq yntymaqtastyq úshin jaýapty qurylymdyq bólimsheleri bastyqtarynyń keńesi ótti., dep habarlaıdy Qorǵanys mınıstrliginiń baspasóz qyzmeti.

Keńes 2016-2017 jyldarǵa arnalǵan Yntymaqtastyq jospary men osyǵan deıingi kelisimder negizinde uıymdastyryldy. Otyrystyń kún tártibine shyǵarylǵan basty máseleler - keleshek Qorǵanys mınıstrlikteriniń keńesi, 2017 jylǵa arnalǵan ShYU-na múshe-memleketterdiń Qorǵanys mınıstrlikteriniń yntymaqtastyq josparynyń barysyn talqylaý bolyp tabylady.
 

Sonymen birge jıynǵa qatysýshylar 2018-2019 jyldarǵa arnalǵan Yntymaqtastyq josparynyń jobasyn jáne basqa da yntymaqtastyq máselelerine qatysty ózekti máselelerdi sóz etti. Búgingi tańda Qazaqstan halyqaralyq uıymdardyń, sonyń ishinde Shanhaı yntymaqtastyq uıymynyń qatysýshysy bolyp, áskerı yntymaqtastyqty aýmaqtyq jáne álemdik deńgeıde damytyp jatyr. Ýaqyt ótken saıyn údep kele jatqan halyqaralyq terrorızm men dinı ekstremızm qateri turaqtylyq pen qaýipsizdikti nyǵaıtyp, úılestirilgen birlesken is-qımyldardy qajet etýde.

Atap aıtqanda, «Beıbit mıssııa» birlesken oqý-jattyǵýlary barysynda ózara árekettestik jetildiriledi. Osy is-shara sheńberinde ShYU-ǵa múshe memleketter lańkestikke, ekstremızm men separatızmge qarsy turý máselelerin qarastyrýda.