ShYU-ǵa múshe elder Memleket basshylarynyń kelesi sammıti Astanada ótedi

ASTANA. QazAqparat – Shanhaı yntymaqtastyq uıymy janynan Turaqty ókilder keńesin qurý jáne olarǵa memleketterimizdiń múddesin qorǵaý quzyretin berý mańyzdy dep sanaımyn. Bul týraly QR Prezıdenti Qasym-Jomart Toqaev ShYU elderi Memleket basshylarynyń keńesinde aıtty, dep habarlaıdy QazAqparat Aqordaǵa silteme jasap.

«Búginde ShYU jańarý jolyna batyl qadam basty. Bul anaǵurlym mol múmkindikterge jol ashady. Damýdyń jańa kezeńinde bizdiń jumysymyz budan bylaı eskirgen tásilderge súıene almaıdy. ShYU-nyń áleýetin arttyrý jolyndaǵy ortaq iste ekijaqty sıpattaǵy problemalardan ózimizdi meılinshe aýlaq ustap, barlyq kúsh-jigerimizdi aradaǵy ýaǵdalastyqtardy júzege asyrýǵa jumyldyrǵan jón. Halyqtarymyzdyń uzaqmerzimdi múddesi úshin ShYU aıasynda árdaıym ózara túsinistik, yntymaqtastyq nıeti basym turýǵa tıis. Shanhaı yntymaqtastyq uıymynyń jańa damý strategııasyn qabyldaıtyn ýaqyt keldi dep oılaımyn. Qazaqstan atalǵan qujattyń jobasyn ázirledi jáne ony aldaǵy tóraǵalyq etý kezinde tanystyrýdy josparlap otyr», - dedi Q.Toqaev.

Memleket basshysy atap ótkendeı, jańa strategııada ózara yntymaqtastyǵymyzdyń anaǵurlym perspektıvti baǵyttary boıynsha ShYU-nyń kún tártibin keńeıtý kózdelgen.

«Uıym qyzmetin odan ári jetildirý jańa syn-qaterlerge tıimdi tótep berip, ShYU-ny zaman talabyna beıimdeý úshin mańyzdy qadam bolmaq. Osy maqsatqa qol jetkizýge arnalǵan Qazaqstannyń usynystaryn eskere otyryp, Astanada ótetin kelesi sammıtke deıin ShYU-nyń áleýetin kúsheıtý tujyrymdamasyn qabyldaýdy usynamyn», - dedi Prezıdent.

«Ózge halyqaralyq uıymdardyń tájirıbesine súıene otyryp, ShYU janynan Turaqty ókilder keńesin qurý jáne olarǵa memleketterimizdiń múddesin qorǵaý quzyretin berý mańyzdy dep sanaımyn. Ádil ári úılesimdi keleshek álem týraly bizdiń óz kózqarasymyz bolýǵa tıis. Ózara jaýapkershilik pen tileýlestik negizinde ınklıýzıvti damý men jasampaz progress jolynda alǵa qaraı batyl qadam basýymyz kerek. Tóraǵalyq etý kezegin qabyl ala otyryp, ShYU keńistigindegi qaýipsizdik, beıbitshilik jáne órkendeý isin odan ári nyǵaıta túsý úshin uıymdaǵy mártebesine qaramastan barlyq elmen aradaǵy belsendi jáne tabysty jumysty jalǵastyramyz. Osy oraıda barshańyzdy Shanhaı yntymaqtastyq uıymynyń Qazaqstan elordasy – Astanada ótetin kelesi sammıtine qatysýǵa shaqyramyn», - dedi Q.Toqaev.