ShYU elderinde terrorıster qolynan 400-den astam adam qaza tapty

ASTANA. QazAqparat – Shanhaı yntymaqtastyq uıymyna (ShYU) múshe memleketterde lańkestik shabýyldyń kúrt ósýi baıqalady. Bul jóninde QR Ulttyq qaýipsizdik komıteti tóraǵasynyń orynbasary Rýslan Seısembaev aıtyp berdi, dep habarlaıdy QazAqparat tilshisi.

«Sarapshylardyń baǵalaýy boıynsha, sońǵy úsh jylda Shanhaı yntymaqtastyq uıymy (ShYU) memleketterinde kem degende 80 rezonanstyq lańkestik shabýyl jasaldy. Bıyl olardyń kúrt ósýi baıqalady. Eger 2022 jyly 18 (lańkestik shabýyl) bolsa, 2023 jyly 47 boldy», - dedi Rýslan Seısembaev elordada ótip jatqan ShYU otyrysynda.

Onyń málimdeýinshe, terrorısterdiń qolynan 400-den astam beıbit azamat qaza taýyp, 940-qa jýyq adam jaraqat aldy.

«Kúsh qurylymdary men quqyq qorǵaý organdaryna kúsh qoldaný áreketteriniń jolyn kesý úshin 300-den astam terrorızmge qarsy operatsııalar júrgizildi. 1 600 terrorıst pen olardyń kómekshileri ustaldy. Bılikke qarsylyq kórsetken 60-qa jýyq qylmysker qamaldy», - dedi UQK tóraǵasynyń orynbasary.

Buǵan deıin lańkester Túrkistandaǵy Qoja Ahmet ıAsaýı kesenesin qoldan jasalǵan jarylǵysh qurylǵymen jarmaq bolǵany týraly habarlaǵan edik.

Aıta keteıik, búgin Astanada Qazaqstannyń tóraǵalyǵymen Shanhaı yntymaqtastyq uıymynyń (ShYU) óńirlik terrorızmge qarsy qurylym RATS keńesiniń 40-y otyrysy ótip jatyr.