ShYU elderinde qarjy terrorızmine qatysy bar 2 myń kúdiktiniń shoty buǵattalǵan

TAShKENT. QazAqparat - XII ShYU múshe-elderi Joǵarǵy Sot tóraǵalary keńesiniń barysynda ShYU Óńirlik terrorızmge qarsy qurylym (ÓTQQ) Atqarý komıteti dırektorynyń orynbasary Ahat Muqashev keńeske qatysýshylardy ShYU ÓTQQ sheńberinde quzyretti organdar jumystarynyń nátıjeleri men qaýip-qaterleri týraly habardar etti, dep habarlady Ózbekstandaǵy «QazAqparat» HAA menshikti tilshisi.

«ShYU ÓTQQ zamanaýı álem úshin negizgi qaýip Sırııa-Irak jáne Aýǵanstan-Pákistan aımaqtaryndaǵy halyqaralyq lańkestik uıymdardan keledi degen halyqaralyq sarapshylardyń baǵalaýyna qosylady. Sonymen qatar, keltirilgen zııandarǵa qaramastan, olar ózderiniń jaýyngerlik qabiletterin saqtap qalýda jáne joǵaryda atalǵan aımaqtardyń ishinde de, tysqaryda da úılestirilgen terrorıstik shabýyldar uıymdastyrýǵa daıyn», - dep atap ótti Ahat Muqashev.

Sonymen birge, ShYU ÓTQQ Atqarý komıtetiniń dırektory orynbasarynyń aıtýynsha, antıterrorıstik qurylymdardyń qyzmeti óz jemisin berip jatyr.

«Sońǵy úsh jylda ShYU ÓTQQ sheńberinde birlesip atqarylǵan jumystar barysynda quzyretti organdar terrorlyq jáne ekstremıstik sıpattaǵy 550-den astam qylmystyń izin kesti. ShYU elderiniń azamattary bolyp tabylatyn 1500-den astam halyqaralyq terrorıstik uıymdar músheleriniń qylmystyq áreketteri áshkerelenip, qarýlary tárkilendi», - dep atap ótti Ahat Muqashev.

Eske salaıyq, Óńirlik terrorızmge qarsy qurylym (ÓTQQ) Shanhaı yntymaqtastyq uıymynyń turaqty áreket etýshi organy bolyp sanalady. ShYU ÓTQQ Tashkent qalasynda ornalasqan.