ShYU elderi barlyq máselelerdi tek dıalogqa súıenip sheshedi - sarapshy

ASTANA. QazAqparat - «Shanhaı segizdigi» aıasynda tolyq quramda ótken samıttiń jaýapkershilik aýmaǵynyń keńeıgeni baıqaldy. Bul pikirdi QR Prezıdenti janyndaǵy Strategııalyq zertteýler ınstıtýty dırektorynyń orynbasary, saıasattaný ǵylymynyń doktory Sanat Kóshkinbaev bildirdi, dep habarlaıdy «QazAqparat» HAA tilshisi.

«Tsındaoda ótken sammıt Shanhaı yntymaqtastyq uıymynyń Azııa óńirinde mańyzdylyǵy arta túskenin taǵy bir márte ańǵartty. Sebebi uıym aıasynda elderdiń aýmaǵyndaǵy túrli salalardaǵy máselelerdi sheshýde ShYU óz úlesin qosyp keledi. Sonymen qatar Qytaı tóraǵalyǵymen ótken sammıt jańa sapada kórindi. Bul aýqymdy shara  alǵash ret altylyq emes, «Shanhaı segizdigi» aıasynda tolyq quramda ótti. Sáıkesinshe, onyń aıasynda jańa kún tártibi engizilip, tyń máseleler pysyqtaldy», - dep atap ótti sarapshy.

Onyń paıymynsha, osyǵan deıin paıda bolǵan «Shanhaı rýhy» termıni óz maǵynasyn aldaǵy ýaqytta saqtap qalýy tıis. Bul óz kezeginde qarsylastyqtyń emes, «yntymaqtastyqtyń rýhy» degen maǵyna bildiredi. Bul turǵyda barlyq máseleler tek dıalogqa súıenip sheshiletini negizgi ustanym retinde belgilengen.

Osy oraıda «Shanhaı rýhy» jahandyq syn-qaterlerdi eńserýge qaýqarly ekenine toqtalǵan S. Kóshkinbaev: «Atap aıtqanda,  birinshi ret segizdik formatynda ótken ShYU-nyń sammıtinde Tsındao deklaratsııasy qabyldandy. Qujatqa uıymǵa múshe 8 memlekettiń basshylary qol qoıdy. Jalpy, uıymǵa múshe elderdiń barlyǵy ózara yntymaqtastyqty nyǵaıtýǵa múddeli ekendikterin tanytyp otyr», - dedi.

Budan buryn habarlanǵandaı, atalǵan samıt aıasynda prezıdentter 17 qujatty rásimdedi.

Olardyń qatarynda ShYU-ǵa múshe memleketter basshylary keńesiniń ShYU-ǵa múshe memleketterdiń uzaqmerzimdi tatý kórshilik, dostyq jáne yntymaqtastyq týraly shart erejesin júzege asyrýdyń 2018-2022 jyldarǵa arnalǵan is-qımyl josparyn bekitý jónindegi sheshimi, 2019-2021 jyldarǵa arnalǵan terrorızm, separatızm jáne ekstremızmge qarsy is-qımyldaǵy yntymaqtastyq baǵdarlamasyn bekitý sheshimi, 2018-2023 jyldarǵan arnalǵan esirtkige qarsy strategııasyn jáne ony oryndaý jónindegi is-qımyl baǵdarlamasyn bekitý sheshimi bar.

«ShYU-ǵa múshe elder qaýipsizdik, ekonomıka, mádenıet jáne gýmanıtarlyq baılanys salalaryndaǵy qatynastardy damytýǵa aıryqsha nazar aýdaryp keledi. Sonymen qatar kún tártibinde terrorızm, separatızm jáne ekstremızmge qarsy is-qımyldar únemi nazardan tys qalmaı keledi. Árıne qaýipsizdik problemalary boıynsha yntymaqtastyq sharalary jalǵasa beredi de», - dep toqtaldy sarapshy.

Bul rette ol ShYU ortalyǵynda Ortalyq Azııa jáne Aýǵanstan turǵanyn, Aýǵanstan problemalary áli de tolyqtaı sheshimin tappaǵanyn eske salyp ótti.