ShYU elderi arasynda saýda-sattyq ulttyq valıýtalarda júrgizilýi múmkin
Konferentsııanyń negizgi maqsaty – Eýrazııadaǵy ózara baılanysty kúsheıtý jolyndaǵy Ortalyq Azııanyń saıası platforma retindegi áleýetine baǵa berý. Sondaı-aq taıaýda bolatyn Samarqan sammıtine daıyndyq barysynda tıisti bastamalar men usynystardy ázirleý josparlanǵan. Nátıjesinde aıtylǵan ıdeıalar men saraptamalyq jumystar uıymdy transformatsııalaýda qoldanylady.
Budan bólek, qazaqstandyq dıplomat Erlik Álı Samarqanda ótetin sammıt aıasynda qabyldanatyn qaýipsizdik, ekonomıkalyq jáne mádenı-gýmanıtarlyq salalardaǵy qujattardyń mańyzdylyǵyna toqtaldy.
«Ekonomıkalyq turǵydan alǵanda, Ortalyq Azııa aımaǵynyń barlyq elderi bir-birimen tyǵyz baılanysty. Sáıkesinshe bir elde qolǵa alynǵan ister basqa memleketterge de áser etedi. Qytaı, Qyrǵyzstan jáne Ózbekstanmen aradaǵy temirjol tranzıtin damytýǵa qatysty máseleler bar. Muny barlyq elder qoldap otyr. Atap aıtqanda, Reseı men Qazaqstan osy jobalarǵa qosylýǵa daıyn. Samarqan sammıti sheńberinde ulttyq valıýtalarda ózara esep aıyrysý týraly usynys ta qabyldanady. Jahandyq qarjy naryǵy shaıqalǵan kezde munyń qanshalyqty mańyzdy ekenin ózińiz túsinesiz», ‑ dedi Erlik Álı.
Halyqaralyq konferentsııaǵa ShYU-ǵa múshe elderdiń ulttyq úılestirýshileri, terrorızmge qarsy óńirlik uıym ókilderi jáne 10-ǵa jýyq eldiń jetekshi sarapshylary qatysty.
Eske sala keteıik, Samarqanda ótetin Shanhaı yntymaqtastyq uıymyna múshe memleketterdiń sammıtinde birqatar eldiń uıymǵa kirý ótinimi qaralady.
Sonymen qatar, uıymnyń qurylǵanyna 21 jyl tolýyna oraı Ózbekstan astanasynda «ShYU halyqtarynyń mýzyka keshi» kontserti ótti.