ShYU baıqaýshylarynyń mıssııasy Qazaqstandaǵy prezıdenttik saılaýǵa úlken mán beredi

NUR-SULTAN. QazAqparat - Búgin QR Syrtqy ister mınıstri Beıbit Atamqulov kezekten tys prezıdenttik saılaýǵa Shanhaı yntymaqtastyq uıymy (ShYU) atynan qatysatyn Baıqaýshylar mıssııasynyń basshysy, ShYU Bas hatshysy Vladımır Norovpen kezdesti, dep habarlaıdy QazAqparat.

QR SІM-niń baspasóz qyzmetinen málim etkendeı, V. Norov ShYU Hatshylyǵy Uıymnyń sońǵy 15 jyldaǵy qyzmetiniń 48-shi mıssııasy bolyp tabylatyn aldaǵy sharaǵa úlken mán beretinin atap ótti.

«Aldaǵy saılaý óte básekeli bolyp tabylady jáne jeti kandıdattyń, sonyń ishinde túrli saıası baǵdarlamalardy usynǵan áıel adamnyń qatysýy arqasynda qazaqstandyq saılaýshylar úshin shynaıy keń tańdaý múmkindigin qamtamasyz etedi», - dep atap ótti ShYU Bas hatshysy.

«ShYU Mıssııasynyń baıqaýshylary Qazaqstannyń 7 iri qalasyndaǵy saılaý ýchaskelerinde jumys isteıtin bolady. Mıssııa quramynda ShYU-ǵa múshe jeti memlekettiń zań shyǵarý, atqarýshy jáne saılaý organdarynyń ókilderi, sondaı-aq Uıymnyń turaqty organdary bolyp tabylatyn Hatshylyq pen Óńirlik terrorızmge qarsy qurylymnyń Atqarý komıtetiniń 25 resmı tulǵasy bar.

SІM-de ótken kezdesýde suhbattasýshylar Shanhaı yntymaqtastyq uıymynyń saıasat pen qaýipsizdik, saýda jáne ekonomıka, sondaı-aq mádenı-gýmanıtarlyq baǵyttaǵy yqpaldastyq sóz boldy. Oǵan qosa, 13-14 maýsymda Bishkek qalasynda ótetin ShYU Sammıtiniń kún tártibi men daıyndyq barysy talqylandy. Osy turǵyda qazaqstandyq Mınıstr bıylǵy 22 mamyrda Bishkekte ótken Uıymnyń syrtqy ister mınıstrleriniń osy is-sharany daıyndaý jónindegi keńesiniń qorytyndysyn, sondaı-aq jalpy Qyrǵyzstannyń ShYU-ǵa tabysty tóraǵalyq etýin erekshe atap ótti», - delingen baspasóz baıanynda.

V.Norov QR Tuńǵysh Prezıdenti - Elbasy Nursultan Nazarbaevtyń Uıym aıasyndaǵy, birinshi kezekte, kópjaqty yntymaqtastyqtyń barlyq baǵyttaryn nyǵaıtýǵa baǵyttalǵan bastamalaryna joǵary baǵa berdi.

ShYU Hatshylyǵy 2004 jyldan bastap saılaýlarda baıqaýshylyqty júzege asyrýda. 15 jyldyń ishinde 47 mıssııa, onyń ishinde 10-ny Qazaqstanǵa joldandy.

ShYU baıqaýshylary 48-shi mıssııasynyń shtaby Uıym Hatshylyǵy jáne múshe memleketterdi qamtıtyn 25 qatysýshydan quralǵan. Mıssııa jumysy respýblıkalyq mańyzy bar 3 qalada jáne 6 oblysta iske asyrylady (Aqmola, Almaty, Atyraý, Shyǵys Qazaqstan, Qaraǵandy jáne Túrkistan oblystary).

Uıymǵa múshe elder - Qazaqstan, Úndistan, Qytaı, Qyrǵyzstan, Pákistan, Reseı, Tájikstan jáne Ózbekstan. ShYU-ǵa baıqaýshy elder - Aýǵanstan, Belarýs, Iran jáne Mońǵolııa. ShYU-nyń dıalog boıynsha áriptesteri - Armenııa, Ázerbaıjan, Kambodja, Nepal, Túrkııa jáne Shrı-Lanka.