ShYU baıqaýshylary Qazaqstannyń 7 qalasynda saılaý protsesin baqylaıdy

NUR-SULTAN. QazAqparat - Shanhaı yntymaqtastyq uıymy baıqaýshylar mıssııasynyń ókilderi Qazaqstannyń 7 qalasynda saılaý protsesin baqylaıdy. Bul týraly elordada Ortalyq saılaý komıssııasynda tilshilerdiń aldynda sóz sóılegen Shanhaı yntymaqtastyq uıymy baıqaýshylar mıssııasynyń basshysy - ShYU Bas hatshysy Vladımır Norov málim etti, dep habarlaıdy QazAqparat tilshisi.

«Jańa ǵana QR Ortalyq saılaý komıssııasynyń tóraǵasy Berik Imashev myrzamen kezdestik. Shanhaı yntymaqtastyq uıymy baıqaýshylar mıssııasy QR Syrtqy ister mınıstri Beıbit Atamqulovtyń shaqyrtýymen Nur-Sultanǵa keldi. Osy shaqyrtýǵa baılanysty QR Prezıdentin kezekten tys saılaý barysyn baqylaıtyn ShYU baıqaýshylar mıssııasy quryldy. ShYU-ǵa júktelip otyrǵan mindetterdiń biri - prezıdent jáne parlament saılaýlaryna, referendýmdarǵa baqylaý júrgizý. Bul jumys bizdiń uıymda 2006 jyly qabyldanǵan tártipke saı júrgiziledi», - dedi Vladımır Norov.

Onyń aıtýyna qaraǵanda, Shanhaı yntymaqtastyq uıymy baıqaýshylar mıssııasy eń alǵash 2004 jyly Qazaqstanda jumysyn bastaǵan.

«Shanhaı yntymaqtastyq uıymy baıqaýshylar mıssııasy múshe-memleketterdiń 25 ókilinen turady. Ol ókilder óz elderiniń zańnamalyq, quqyqtyq salalarynan kelip qosylǵan. Olar - joǵary sanatty saıasatkerler. Bizdiń mıssııa búgingi kúni Qazaqstanda jumysyn bastap ketti dese de bolady. Bizdiń ókilder Qazaqstanyń 7 qalasynda, Nur-Sultan, Almaty, Shymkent, Túrkistan, Qaraǵandy, Atyraý jáne Óskemen qalalarynda jumys júrgizip jatyr. Sonymen qatar, biz 6 aımaqty, Aqmola, Almaty, Qaraǵandy, Atyraý, Túrkistan jáne ShQO-ny qamtyp otyrmyz», - dedi ol.

Vladımır Norov óz sózinde ShYU baıqaýshylar mıssııasy saılaýdyń ádil ótýi úshin barynsha kúsh salatynyn atap ótti.

«7 maýsymda tolyqqandy jumysty bastap, 8 maýsymda - tynyshtyq kúni desek, 9-ynda bizdiń ókilder óz qyzmetin oryndap, saılaý protsesine baqylaý júrgizedi. Álbette, Qazaqstannyń saılaý zańnamasynda birshama jańashyldyqtar baryn bilip otyrmyz. Bul jańashyldyqtar ShYU elderine de úlgi bolary sózsiz», - dedi ol.

Aıta keteıik, aldaǵy 9 maýsym kúni ótetin prezıdenttik saılaýǵa 7 kandıdat túsedi.