ShYU Bas hatshysy: Astana - uıymnyń jańa otbasynyń besigi

BEIJІŃ. QazAqparat - Qytaıdyń Tsındao qalasynda ótetin Shanhaı yntymaqtastyǵy uıymynyń sammıti qarsańynda ShYU Bas hatshysy Rashıd Alımov byltyr ótken Astana sammıtin joǵary baǵalady, dep habarlaıdy «QazAqparat» HAA-nyń Qytaıdaǵy menshikti tilshisi.

«Astana - ShYU tolyqqannan (uıymǵa Úndistan men Pákistan qosyldy - red.) keıin onyń otbasynyń besigine aınaldy. Árıne, Astanadaǵy ShYU sammıtine daıyndyq biz úshin asa mańyzdy edi. Biz ol kezde barlyq baǵytta, sonyń ishinde ShYU-ǵa jańadan múshe bolǵan memleketterdiń mindettemeleri týraly memorandýmdy ázirleý boıynsha da jumys istedik. Erekshe aıta ketken jón, 2005 jyly Astanada Úndistan men Pákistan baqylaýshylar retinde qabyldanyp, araǵa 12 jyl salyp, dál osy Astanada olar ShYU-nyń tolyqqandy múshesi mártebesin aldy. Ekinshi sózben aıtqanda, Astana ShYU-nyń jańarǵan lokomotıviniń dańǵyl jolyn bastap berdi. Uıym sodan beri segiz jaıly «vagonymen» senimdi bolashaqqa bet túzep keledi», - dedi ol Qytaı jáne Qazaqstan jýrnalısteri úshin uıymdastyrylǵan baspasóz máslıhatynda «QazAqparat» HAA suraǵyna jaýap bere otyryp.

Dıplomat ShYU-ǵa Qazaqstan tóraǵalyq etken tusta, 2017 jyly tarıhta alǵash ret Uıymnyń shtab-páterinde ShYU astanasynyń tanystyrylymy ótkenin tilge tıek etti. Aıta keteıik, 2017 jyly Astana ShYU astanasy dep jarııalanǵan bolatyn.

«Bunyń, bir jaǵynan, emotsıonaldyq, ekinshi jaǵynan, is júzindik mańyzy bar edi. Óıtkeni sol kezde kóptegen adam endi ǵana 20 jasqa qadam basqan álemdegi eń jas astananyń záýlim de ásem sáýlet ansamblderiniń bar sulýlyǵyna kýá boldy», - dedi R. Alımov.

Onyń sózine qaraǵanda, osynaý qysqa merzim ishinde Astana barlyq baǵyttardaǵy asa aýqymdy halyqaralyq oqıǵalardyń ortalyǵyna aınaldy.