ShYU aıasynda jańa tehnologııalar boıynsha tájirıbe almasatyn alań qajet - Elbasy

TsINDAO. QazAqparat - Shanhaı yntymaqtastyq uıymy aıasynda tsıfrlandyrý men jańa tehnologııalar boıynsha tájirıbe almasatyn alań qurý qajet. Bul týraly búgin Qytaıdyń Tsındao qalasynda Shanhaı yntymaqtastyq uıymyna múshe memleketter basshylarynyń keńeıtilgen quramdaǵy otyrysynda Elbasy Nursultan Nazarbaev aıtty, dep habarlaıdy QazAqparat tilshisi.

«Álemde álemdik valıýta sebetin ártaraptandyrý, valıýtaǵa táýeldilikti tómendetý jáne krıptovalıýtanyń paıda bolýy týraly kóp aıtylyp júr. Osyǵan baılanysty biz ShYU-nyń barlyq elderiniń ulttyq valıýtasynda ózara esep aıyrysýǵa kóshýdi elderimizdiń ekonomıkasynyń qaýipsizdik aspektileriniń biri retinde oılastyrǵan jón. Bizdiń elderimizdiń Ortalyq bankteri búgingi Tsındao sammıtinen keıin birge bas qosyp, sáıkesinshe jol kartasyn ázirleýdi bastaı alar edi», - dedi Nursultan Nazarbaev.

Qazaqstan Prezıdenti tórtinshi ónerkásiptik revolıýtsııa jaǵdaıynda ekonomıkany tsıfrlandyrý men robottandyrýda jańa tehnologııalyq transformatsııa júrip jatqanyn aıtty.

«Tsıfrlandyrý men jańa tehnologııalar salasynda tájirbıe almasý jónindegi alań qurý múmkinshiligin qarastyrýdy usynamyn»», - dedi Elbasy.

Aıta keteıik, otyrysqa Qazaqstan Prezıdenti Nursultan Nazarbaev, Reseı Prezıdenti Vladımır Pýtın, Qyrǵyz Prezıdenti Sooronbaı Jeenbekov, Pákistan Prezıdenti Mamnýn Hýseın, Tájikstan Prezıdenti Emomalı Rahmon, Ózbekstan Prezıdenti Shavkat Mırzıeev, Úndistan Premer-Mınıstri Narendra Modı, ShYU-ǵy baıqaýshy mártebesi bar Aýǵanstan Prezıdenti Ashraf Ǵanı, Belarýs Prezıdenti Aleksandr Lýkashenko, Iran Prezıdenti Hasan Roýhanı jáne Mońǵolııa prezıdenti Haltmaagıın Battýla jáne birqatar halyqaralyq uıymnyń basshylary qatysýda.

Keńeıtilgen quramdaǵy otyrystan keıin sammıttiń basty qujaty Tsındao deklaratsııasy qabyldanyp, 20-dan astam qujatqa qol qoıylmaq. Onyń 17-sin Memleket basshylary rásimdeıdi.