«Shyrsha» operatsııasy: Tártip saqshylary reıdter ótkizýde - SQO
PETROPAVL. QazAqparat – Soltústik Qazaqstan oblysynda qylqan japyraqty aǵashtardy zańsyz kesýden qorǵaý maqsatynda «Shyrsha» jedel-profılaktıkalyq is-sharasy ótip jatyr, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, jańa jyl merekesi qarsańynda shyrsha saýdalaıtyn oryndar erekshe baqylaýǵa alynady. Kásipkerlerde taýarǵa qatysty qujattar: aǵashtyń jetkizilgen jerin rastaıtyn qujat jáne saýda ortalyǵynyń saýdaǵa ruqsat bergeni jóninde shart bolýy qajet. Maqsat – brakonerlik jolmen kesilgen aǵashtardyń saýdaǵa shyǵýyna jol bermeý.
«Reıdke polıtseılerden basqa, jelilik polıtsııa bóliminiń qyzmetkerleri, Tabıǵı resýrstar basqarmasy men Qyzyljar orman sharýashylyǵynyń ókilderinen turatyn mobıldik top shyǵyp júr. Orman sharýashylyǵynyń qyzmetkerleri qylqan japyraqtylardy brakonerlerden qorǵaý úshin beketter qoıyp , polıtseılermen udaıy baılanys ornatty.
Patrýldik polıtsııa batalonynyń qyzmetkerleri shyrsha tasymaldaıtyn júrgizýshilerdiń qujattaryn tekseredi. Búginge deıin zań buzýshylyqtar anyqtalmady», - dedi SQO PD JPQB tabıǵatty qorǵaý polıtsııasy tobynyń aǵa ınspektory Sergeı Kokorın.
Tártip saqshylary aǵashty zańsyz keskenderge aıyppul salynatynyn eskertedi. Eger memleketke keltirilgen shyǵyn kólemi 100 AEK mólsherinen
assa, qylmystyq is qozǵalady. Qylmys toppen jasalǵan jaǵdaıda, bas bostandyǵynan aıyrý jazasy qoldanylady.
