«Shyraıly Shymkent» respýblıkalyq baıqaýy qorytyndylandy
ShYMKENT. QazAqparat - Shymkent qalasy kúni merekesi qarsańynda jýrnalıster men blogerler arasynda «Shyraıly Shymkent» atty respýblıkalyq baıqaý jarııalanǵan bolatyn. Qala ımıdjin kóterýge shyǵarmashylyq qarymymen úles qosqan BAQ ókilderi arasyndaǵy baıqaý óz máresine jetti, dep habarlaıdy QazAqparat HAA tilshisi.
Alty aı boıyna jalǵasqan jarysta jeńimpazdar toǵyz nomınatsııa boıynsha marapattaldy. «Shymkent qalasy týraly áleýmettik jelilerdegi (blogerler arasynda) úzdik jarııalanym» boıynsha Ashat Shotaev , «Baspacózdegi (gazet, jýrnaldar) úzdik jarııalanym» nomınatsııasymen Lıýbov Dobrota marapattaldy. Maqsat Ássándı «Shymkent qalasy týraly aımaqtyq deńgeıdegi saıttarda úzdik jarııalanym», Jansaıa Táýekelqyzy «Shymkent qalasy týraly respýblıkalyq deńgeıdegi saıttarda úzdik jarııalanym», Erbolat Muhamedjan «Shymkent qalasy týraly telearnalardaǵy úzdik sıýjet» nomınatsııalaryn jeńip aldy.
Al, qala týraly úzdik esse jazǵan Shynar Júnisbekova, úzdik foto-vıdeo materıaldar túsirgen Bereke Seıitjappar, qalany tanystyrý týraly kreatıvti materıaldar jarııalaǵan Aıgúl Amıtovalar da jeńimpaz atandy. «Qala turǵyndarynyń ómiri men dástúri jaıly úzdik foto-vıdeo materıaldar» nomınatsııasy Dáýren Aımanbetovke buıyrdy. Qatysýshylarǵa qala ákiminiń «Alǵys haty» jáne arnaıy syılyqtar tabys etilse, jeńimpazdarǵa 100 000 teńge syıaqy berildi.Júldegerlerdi marapattaý rásimine qatysqan Shymkent qalasy ákiminiń orynbasary Qaırat Yrzaqululy qatysýshylarǵa alǵysyn bildirdi.
«Bul baıqaýdy jyl saıyn uıymdastyrýdy qolǵa aldyq. Elbasy Nursultan Ábishuly Nazarbaev Shymkenttiń respýblıkamyzdaǵy úshinshi megapolıske aınalýy kerektigin atap ótkendeı, qalamyzdyń árbir turǵyny osy mártebege jetý jolynda aıanbaı eńbek etýi kerek. Bul baǵytta qoǵam belsendileri, blogerler men jýrnalısterdiń orny erekshe», - deıdi Qaırat Nurtaı.
Kesh sońy kontserttik baǵdarlamaǵa ulasyp, kofe breık uıymdastyryldy.
