Shyńjańdyq 71 jastaǵy qart 150 qasqyrmen birge taý arasynda turady
ASTANA. QazAqparat - Qytaıdyń Sanjy oblysyna qarasty Jemsary aýdanynda «Qasqyrly saı» dep atalatyn ańǵar bar. Bul jerde qasqyr baǵatyn Iań Shańshyń esimdi 71 jastaǵy qarııa turady, dep habarlaıdy QazAqparat tilshisi.
Jaqynda Qytaıdyń Tıan-Shan aqparattyq portaly qasqyr baǵýǵa qumar qarııanyń ómirimen tanysyp qaıtty.
«Iań Shańshyńnyń «qasqyrly saıynda» 8 túrli bóri tuqymynan 150 -den astam jabaıy qasqyr ómir súredi. Qarııa ár kúnin jabaıy jyrtqyshtarmen birge kóńildi ótkizýde», dep jazady aqparattyq portal derekkózge silteme jasap.
Qarttyń aıtýynsha, ol bóri tuqymyn eń alǵash qazaq dosynyń úınen kóripti. Shynjyrlap baılaýly turǵan bóltirikke jany ashyp, ony dosynan baǵýǵa surap alǵan eken. Onyń qasqyr baǵýǵa degen yntasy osydan bastalǵan.
Alǵashynda týystary qarsylyq tanytqanymen onyń jabaıy jyrtqyshqa degen qumartýshylyǵyna eshkim tosqaýyl bola almaǵan. Búginde ol úlken ańǵardy jalǵa alyp, arnaıy bóri baǵatyn orynǵa aınaldyrǵan. Iań Shańshyńnyń aıtýynsha, jyrtqyshtardyń azyǵyna jylyna 1 mıllıon ıýan qarjy ketedi eken. Bul shyǵyndy ol óziniń jeke bıznesimen aqtaıdy
«Jabaıy ańdarda adamdardyń janashyrlyǵyn sezinedi jáne laıyqty jaýap ta qaıtarady. Qasqyrlar óz súıispenshiligin adamǵa jaqyndap aıaǵyna oralyp, aqyryn tisteleý arqyly bildiredi», - deıdi qarııa.
