Shyńjańdaǵy qazaq qyzy 6 myń shaqyrym joldy "temiratpen" júrip ótti

NUR-SULTAN. QazAqparat- Qytaıdaǵy qandasymyz 22 jastaǵy Káýsar Qızatqyzy 6 myń shaqyrym joldy velosıpedpen júrip ótti dep habarlaıdy, QazAqparat tilshisi.

Ol 15 mamyr kúni Qytaıdyń Shynjyn qalasynan týǵan jeri ShUAR-dy betke alyp jolǵa shyqqan bolatyn. 28 shilde kúni Úrimji qalasyna jetti. Jol uzaqtyǵy 6 myń shaqyrymdy quraıdy. Qandasymyz bıyl osy qalada joǵarǵy oqý ornyn bitirgen. Onyń aıtýynsha, ol bul saparyn jastyq shaǵynyń bir belgisi retinde qaldyryǵysy kelgen.

«Shynjynnan Úrimjige ushaqpen de, poıyzben de qaıtýdyń múmkindigi bar edi. Alaıda, osyndaı densaýlyǵym jaqsy, ózime táýeldi ýaqytym bar kezinde, kóp nársege bas aýyrtpaıtyn alańsyz jastyq shaǵymda este qalarlyqtaı bir erlik jasaǵym keldi», - deıdi Káýsar Qızatqyzy.

Sonymen birge ol óziniń joldaǵy qıyndyqtarymen de bólisti.

«Joldaǵy men úshin eń qıyn bolǵan jer Shıńlıń taýynan asý boldy. 7 saǵat boıy ıen taý jolynda júrdim, kún jańbyrly, taýdyń ústi torlaǵan tuman, jalǵyz ózime erekshe qorqynyshty boldy. Alaıda, «Káýsar, qanshama joldy basyp óttiń, buǵan da tózýiń kerek, aspaıtyn asý joq, shyqpaıtyn shyń joq», dep ózime medeý berip, odan da asyp óttim. Osy eki jarym aıǵa jýyq joldaǵy jalǵyz saparym men úshin ómir boıy este qalarlyqtaı boldy. Osy oraıda, qazirigi jastarǵa aıtarym, jalyndaǵan jastyq shaqtaryńda oıǵa alǵan armandaryńdy jasaýǵa qulshynyńyzdar, ómirlerińizge ókinish qaldyrmańyzdar!» -deıdi qazaq qyzy.