Shynjańda tabıǵı apattyń saldarynan 1,41 mıllıonnan astam adam zardap shekti
BEIJІŃ. Qańtardyń 26-sy. QazAqparat /Rýslan Súleımenov/ - Qalyń jaýǵan qar men qatty aıazdyń saldarynan Qytaıdyń Shynjań-Uıǵyr avtonomııalyq ólkesinde 1,41 mıllıonnan astam jergilikti turǵyn zardap shegip otyr, 13 adam qaza boldy.
Sınhýa agenttiginiń habarlaýynsha, dúısenbi kúni Qytaıdyń Qarjy mınıstrligi tabıǵattyń tosyn minezinen zardap shegip otyrǵan aýyl sharýashylyǵy men mal sharýashylyqtaryn qalpyna keltirý maqsatynda Shynjań turǵyndaryna ortalyq bıýdjetten qosymsha 14 mıllıon ıýan qarjy bóldi.
Oǵan qosa, Qytaı Memlekettik keńesiniń premeri Tszıabao ótken demalys kúni istiń mán-jaıymen jáne jergilikti ókimettiń apat saldaryn joıý jónindegi atqaryp jatqan jumystarymen tanysý maqsatynda zardap shekken aýdandarǵa - Shynjańnyń Altaı jáne Tachen qalalaryna ınspektsııalyq sapar jasady.
