Shynjańda sel tasqynynan 1 myńdaı adam qutqaryldy
BEIJІŃ. Tamyzdyń 3-i. QazAqparat /Rýslan Súleımenov/ - Shynjań-Uıǵyr avtonomııalyq ólkesiniń Kýcha ýezinde júrgizilgen izdeý-qutqarý jumystarynyń nátıjesinde 1 myńǵa jýyq jergilikti turǵyn qaýipsiz jerge kóshirildi,
dep habarlaıdy jergilikti buqaralyq aqparat quraldary.
Jergilikti ókimettiń aqparaty boıynsha, negizinen qutqarý jumystary aıaqtalyp qaldy, degenmen izdeý-qutqarý jasaqtary apat aımaǵynan shyǵa almaı qalǵandardy izdestirýde.
Jumystar ótken senbi, shildeniń 31-inde bastaldy, sol kúngi operatsııanyń nátıjesinde 545 adam qutqaryldy. Al jeksenbi, tamyzdyń 1-i kúni qutqarý jumystaryna Shynjańda ornalasqan armııa avıatsııasy brıgadasynyń tikushaqtary jumyldyrylyp, olardyń kómegimen Kýcha ýeziniń soltústigindegi taýly aýdandardan taǵy 404 adam shyǵaryldy. Qutqarylǵandardyń jalpy sany 949 adamǵa jetti.
Ótken beısenbi, shildeniń 29-y kúni Kýcha ýeziniń soltústigindegi taýly aýdandarda qatty nóser bolyp, sonyń saldarynan týyndaǵan sel tasqyny joldar men kópirlerdi shaıyp ketken edi. Birneshe júzdegen jergilikti turǵyndar, jol jumysshylary men týrıster tasqyn sýdyń tutqynynda qalyp qoıdy. Ázirge qurban bolǵandar týraly aqparat joq.
