Shyńjańda óltirilgen 14 uıǵyr men qolǵa túsken 4 uıǵyrdy Qytaıdyń resmı bıligi lańkester dep jarııalady
BEIJІŃ. 21 shilde. QazAqparat /Rýslan Súleımenov/ - Ótken dúısenbi, 18 shilde kúni bir top er adam Shyńjań-Uıǵyr avtonomııalyq aýdanynda (Qytaıdyń soltústik-batysy) ornalasqan Qotan qalasynda polıtsııa ýchaskesine shabýyl jasaǵan.
Qytaılyq BAQ aqparattary boıynsha, olar ǵımaratqa basyp kirip, polıtsııaǵa shabýyl jasaǵan, adamdardy kepildikke alyp, órt uıymdastyrǵan. Bir jarym saǵatqa jalǵasqan operatsııa barysynda shabýyl jasaǵan 14 adam qaza taýyp, tórteýi qolǵa tústi. Kepildikke alynǵan alty adam bosatyldy. Qarýly halyqtyq áskerdiń bir sarbazy, bir jasaqshysy jáne eki kepil kóz jumdy.
Resmı bıliktiń aıtýynsha, polıtsııa bólimine shabýyl jasaǵan er adamdar 20 men 40 jas aralyǵyndaǵy uıǵyr ultynyń ókilderi. «Olardyń barlyǵy ekstremıstik dinı uıymnyń múshesi bolǵan. Olar dinı urandar aıtyp, týlar kóterip shyqan», - dedi aımaqtyq aqparattyq basqarmanyń bastyǵy Hoý Hanmın.
Qytaı bıligi polıtsııa ýchaskesine jasalǵan shabýyl «lańkestik aktsııamen josparlanǵan» degen pikirde.
