Shyńjanda koronavırýs juqtyrǵandar sany artyp jatyr

BEIJІŃ. QazAqparat – Qytaıdyń Shyńjan-Uıǵyr avtonomııalyq ólkesinde COVID-19 jańa koronavırýsyn juqtyrǵandar sany 115-ke jetti, dep habarlaıdy QazAqparat jergilikti densaýlyq saqtaý komıtetine silteme jasap.

«Ótken táýlikte ólkede Shyńjan óndiristik-qurylys korpýsyn qosqanda (ShÓQK) 20 koronavırýs juqtyrý oqıǵasy tirkeldi. Jalpy 2020 jyldyń 24 shildesi 24.00-degi málimet boıynsha, Shyńjanda 115 ınfektsııaǵa shaldyǵý oqıǵasy (onyń 113-i - Úrimjide, bireýi - Qashqarda jáne taǵy biri - ShÓQK-de), sonymen qatar 114 sımptomsyz vırýs tasylmaldaýshylar anyqtalǵan (barlyǵy Úrimjide). 7 myńnan asa adam medıtsına qyzmetkerleriniń baqylaýynda» delingen komıtettiń aqparat bıýlleteninde.

Buǵan deıin Úrimji qalasynyń eki aýdany epıdemııalogııalyq qaýip dárejesi joǵary eldimekender dep jarııalanǵan.

Eske sala ketsek, Shyńjanda COVID-19 vırýsy taraı bastaǵan sátten keıin 149 kún boıy koronavırýs juqtyrý oqıǵasy tirkelmedi.

Shyńjan-Uıǵyr avtonomdy aýdanyndaǵy eń alǵashqy ınfektsııaǵa shaldyǵý oqıǵasy 23 qańtar kúni anyqtalǵan.