Shyńjanda 100 kúnnen beri eshkim koronavırýs juqtyrǵan joq
«2020 jyldyń 31 mamyr 00:00 ýaqytyna sáıkes, Shyńjan-Uıǵyr avtonomııalyq ólkesinde (Shyńjan óndiristik-qurylys korpýsyn qosqanda) jańa indet juqtyrý oqıǵasy anyqtalǵan joq jáne tirkelmegenine 104 kún boldy» delingen komıtet habarlamasynda.
Aıta ketsek, Shyńjan-Uıǵyr avtonomııalyq ólkesinde eń alǵash koronavırýs juqtyrǵan adam 23 qańtarda tirkeldi. Shyńjanda jalpy ınfektsııa juqtyrǵandar sany 76 adamǵa jetip, onyń úsheýi qaıtys boldy.
«Ótken táýlikte qurlyqtyq Qytaıda koronavırýs juqtyrýdyń 16 jańa faktisi tirkeldi (barlyǵy syrttan kelgen, Sychýanda – 11, Gýandýnda – 2, Іshki Mońǵolııa avtonomııalyq ólkesinde – 3)» delingen QHR Densaýlyq saqtaý jáne gıgıena isteri memlekettik komıtetiniń kún saıynǵy esebinde.
Qytaıdyń medıtsınalyq mekemelerinde koronavırýs juqtyrǵan 76 adam jatyr, ótken táýlikte 3 naýqas emdelip shyqty. Qaıtys bolǵandar tirkelgen joq.
Sáýir bastalǵaly Qytaıda COVID-19 juqtyrǵan, biraq aýrýdyń eshqandaı belgileri joq adamdarǵa bólek statıstıka júrgiziledi. Ótken táýlikte vırýs juqtyrǵan 16 adamda aýrýdyń eshqandaı belgileri bolmaǵan. Qazirgi kúni mundaı 397 naýqas medıtsına qyzmetkerleriniń baqylaýynda.
Epıdemııa bastalǵan ýaqyttan beri qurlyqtyq Qytaıda COVID-19 juqtyrǵandardyń jalpy sany 83 017 adamǵa jetti, 78 307 naýqas emdelip, aýrýhanadan shyǵarylsa, 4634 adam qaıtys boldy.
Avtor: Rýslan Súleımenov