«Shyńyraý» fılmi Úndistandaǵy kınofestvalge qatysady
ALMATY. QazAqparat - Rejısser Jańabek Jetirýovtyń «Shynyraý» atty kórkem fılmi Úndistannyń Trıssýr qalasynda (IFFT) ótetin Halyqaralyq kınofestıval baǵdarlamasyna irikteýden ótti, ol 6-12 naýryzy aralyǵynda Úndistanda Kerala shtatynda ótedi, dep habarlaıdy QazAqparat «Qazaqfılm» kınostýdııasyna silteme jasap.
Festıvaldiń tarıhy 2004 jyly Trıssýr men qala mańyndaǵy kınony shynaıy baǵalaýshylardyń, sondaı-aq úkimet pen bıznes-qaýymdastyqtyń qamqorlyǵynyń arqasynda bastaldy. Aıta ketsek, ótken festıvalderde úndistandyq kórermender kınotýyndynyń dramatýrgııasyn jáne kórkemdik oıyn erekshe joǵary baǵalaǵan bolatyn.
Bıyl IFFT 15-shi ret ótedi jáne kıno mádenıetin damytyp, óz aýdıtorııasyn zamanaýı jáne klassıkalyq kıno týyndylarymen tanystyrady. Festıval Azııa jáne Afrıka elderiniń úzdik fılmderin zertteýge arnalǵan.
Ábish Kekilbaevtyń povesi «Shyńyraýdyń» jelisi boıynsha túsirilgen kartına qudyq qazýshy Eńseptiń oqıǵasyn baıandaı otyryp, menmendik, baqtalastyq, mahabbat, dostyq, qastandyq syndy adamǵa tán qubylystardy kóteredi.
Esterińizge sala ketsek, fılmniń túsirilimderi Mańǵystaý oblysynda ótti. Kartınada Qaraqııa oıysy, Ústirt shoqysy jáne Kaspıı teńizi kórinis tabady. Fılmdegi basty rólderdi Asylhan Tólepov, Aldabek Shalbaev jáne Aıjan Jetirý somdady.
Aıta ketsek, bul týyndy Bangladeshte ótken 17-shi halyqaralyq festıvaliniń azııalyq fılmder baıqaýyna qatysyp, «Úzdik operatorlyq jumys» (operatory Rıvkat Ibragımov) júldesin jeńip aldy. Odan bólek, «Shyńyraý» fılmi byltyr qarasha aıynda Qytaıdyń Sıamen qalasynda ótken 28-shi «Altyn átesh jáne Júz gúl» atty Búkilqytaılyq festıvaldiń konkýrstyq baǵdarlamasyna qatysyp, Máskeýde Ábish Kekilbaevtyń 80 jyldyǵyna oraı uıymdastyrylǵan Qazaqstan kınosy kúnderiniń ashylý saltanatynda kórsetildi.
Al ótken aptada otandyq kınotýyndy Amerıkanyń Arızona shtatynda ótken Asian International Film Festival Arizona kınofestıvaliniń konkýrstyq baǵdarlamasyna qatysty.
Byltyr jeltoqsan aıynyń basynda otandyq kınotýyndy Úndistannyń Tırývanantapýram qalasynda ótken Kerala Halyqaralyq kınofestıvaline qatysqan.
