«Shyńyraý» anımatsııalyq fılmi Brazılııadaǵy festıvalde úzdik dep tanyldy
NUR-SULTAN. QazAqparat – Balapan telearnasynyń «Shyńyraý» anımatsııalyq fılmi Brazılııadaǵy halyqaralyq festıvalde «Úzdik saýndtrek» nomınatsııasyn jeńip aldy, dep habarlaıdy QazAqparat.
Bul týraly telearnanyń dırektory Maqpal Jumabaı Facebook-tegi paraqshasynda jazdy.
«Brazılııadaǵy Baıa Halyqaralyq anımatsııalyq festıvalinde (FESTIVAL INTERNACIONAL DE ANIMAÇÃO DA BAHIA) Balapan telearnasynyń «Shyńyraý» anımatsııalyq fılmi «Úzdik saýndtrek» nomınatsııasynda jeńimpaz atandy!
«Shyńyraý» – «Qońyr qaz» anımatsııalyq jobasynyń 2D qysqametrajdy fılmderiniń biri. Onda biz anımatsııa kómegimen klassıkalyq mýzykalyq shyǵarmanyń sıýjetin, sondaı-aq, Yqylas Dúkenulynyń kúıindegi mıfologııalyq jáne folklorlyq saryndardy beıneleýge tyrystyq. Qobyzdyń qaıtalanbas úni arqyly qazaq halqynyń baı mádenıetin kórsetýge tyrystyq», - deıdi Maqpal Jumabaı.
Týyndyny Balapan telearnasynyń ujymy, stsenarıster Zıra Naýrzbaeva men Tamara Muqanova, qobyzshy Aknar Sharıpbaeva, rejısser Dılshat Rahmatýllın, Dala Animation komandasy birlesip jasaǵan.
«FIAB @fiab_festival festıvaliniń uıymdastyrýshylaryna, kórermenderine jáne qazylar alqasyna bizdiń fılmdi sezinip, baǵalaǵandary úshin rahmet aıtqymyz keledi», - dep jazdy Balapan arnasynyń dırektory.
