Shyńǵyshannyń músini Londonda ornatylmaq
ASTANA. 14 sáýir. QazAqparat - Shyńǵyshannyń attyń ústinde otyrǵan bes metrlik qoladan quıylǵan músini Londonda Gaıd-parktiń soltústik-shyǵys bóliginde ornatylmaq, dep habarlady ITAR-TASS.
Ony reseılik músinshi Dasha Namdakov jobalady. Shyńǵyshan músininiń saltanatty ashylýy býrıat sýretshisi, usta jáne zerger D.Namdakovtyń Londonnyń «Helsıon» galereıasyndaǵy shyǵarmalar kórmesimen ushtastyrylyp otyr. «Álemdik kóshpendi» dep atalatyn kórme 5 mamyrda ashylyp, 7 shildege deıin sozylady. Mońǵol ımperııasynyń negizin qalaǵan uly qolbasshynyń qola músini onyń ishki kúsh-qýatyn, alǵa umtylǵan jaýyngerlik beınesin beıneleıdi. Qarý-jaraqtaryn asynyp, at ústinde otyrǵan ol beıne-bir aspannan túskendeı áser qaldyrady.
«Bul shyǵarmamen jumys ústinde men tarıhı tulǵanyń ǵana emes, aspannan túsip, adamdarǵa izgilik sepken epostyq batyrdyń keıpin berýge tyrystym, - dedi músinshi jýrnalısterge bergen suhbatynda. - Onyń tiri kezindegi beınesi saqtalmaǵan. Derekti faktiler de ártúrli. Sondyqtan da epostyq keıipke toqtaldym».
Namdakov bul jobany eki jyldan astam ýaqyt ázirlegen. Ótken jyly músinshi Býkıngem saraıynda Elızaveta ІІ patshaıymnyń jubaıymen kezdesken. Edınbýrg gertsogy reseılik músinshiniń shyǵarmashylyǵyna qyzyǵýshylyq tanytqan.
Býddıst-sýretshiniń jumystary Tretıakov galereıasynda jáne Ermıtajda qoıylǵan. 2003 jyly Namdakov Reseı kórkemsýret akademııasynyń múshe-korrespondenti ataǵyna ıe boldy. Músinshi Japonııaǵa kórme ázirleýde jáne Shanhaı ókimet oryndarymen qala úshin monýmentaldyq shyǵarmalar jasaý jóninde kelissózder júrgizýde.
