Shyńǵys xannyń jolymen: Kelesi jyly túrki xalyqtarynyń Úlken quryltaıy ótedi
Komıtettiń ókili Ibragım Halıldiń aıtýynsha, ol jerde naqty tórt másele - túrki tiliniń ámbebap sózdigin qurý, biryńǵaı alfavıtti qurastyrý, ortaq tarıxty zertteý jáne túrki fılosofııasynyń kitabyn daıarlaý talqylanady. «Bizdińshe, dál osy mańyzdy máseleler boıynsha quryltaıdy shaqyrýǵa bolady. Kezinde Shyńǵys xanda osy ispetti quryltaıdy shaqyryp, túrki xalyqtaryn biriktirýdi kózdedi. Buryn ol maqsat Shyńǵys xannyń aldynda tursa, qazirgi kezde árqaısysymyz túrki xalyqtarynyń birligine alańdaýymyz qajet. Bálkim, ondaı bastama bireýge unamaı qalýy múmkin. Degenmen, oǵan túrki xalyqtarynyń barlyq ult pen ulystarynyń ókilderi qatysýy tıis. Biz ata-babalarymyz sııaqty kıiz úılerdi kóptep tigip, burynǵy zamandaǵy sııaqty úlken quryltaıdy ótkizýdi kózdeımiz», - deıdi Halıl myrza.
Onyń aıtýynsha, Úlken quryltaıdy Han Táńiri mańaıynda (Qazaqstan men Qyrǵyzstannyń shekarasy) uıymdastyrý josparlanyp otyr. Aǵymdaǵy jyly 7 qarashada Qazaqstanda uıymdastyrý komıtetiniń otyrysy ótedi. Al kelesi jyly shamamen 8 tamyzda túrki xalyqtarynyń Úlken quryltaıy uıymdastyrylady degen jospar bar. Quryltaıdyń aqsaqaldar keńesine Qazaqstannyń atynan qoǵam qaıratkerleri Oljas Súleımenov pen Myrzataı Joldasbekov endi.
«Biz bireýdiń jeke sharýasyna, memlekettiń ishki saıasatyna aralaspaımyz. Sondyqtan quryltaıdy uıymdastyrýǵa adam shaqyrǵanda olardyń oppozıtsııanyń quramyna kirmegenin, sosyn memlekettiń saıası jumysyna belsene atsalyspaǵanyn qaladyq. Biz árbir memlekettiń jumysyn joǵary baǵalaımyz. Alaıda quryltaı - ol taza qoǵamdyq jumystyń nátıjesi. Onyń saıasatqa, ıa bolmasa, geosaıasatqa eshbir qatysy joq», - dep atap kórsetti Ibragım Halıl.
