Shyńǵys Muqan shymkenttikter arasynda KVI-men aýyrǵandardyń nege kóp ekenin túsindirdi

NUR-SULTAN. QazAqparat – Ortalyq kommýnıkatsııalar qyzmetinde ótken brıfıngide Shymkent qalasy ákiminiń birinshi orynbasary Shyńǵys Muqan qala turǵyndary arasynda koronavırýs pnevmonııasymen aýyrǵandardyń nege kóp ekenin túsindirdi, dep habarlaıdy QazAqparat tilshisi.

«KVI+» pen «KVI-»-ti statsıonarǵa barǵan boıda PTR-test arqyly anyqtaıdy. Onyń ústine kompıýterlik tomografııadan ótedi. Ókinishke qaraı, koronavırýs ınfektsııasy juqqan boıda emdi bastap ketpese, onyń ári qaraı pnevmonııaǵa aınalý qaýpi óte joǵary. Sondyqtan, bizde Shymkent qalasynda ózdiginen emdelgen adamdar boldy. Sol ýaqytta jyldam sheshim qabyldap, dárihanalardyń janyndaǵy jeke menshik túrli ekpe qabyldaý oryndarynyń jumysyn rettedik. Naýqastardyń bárinen vırýs belgilerin baıqaǵan boıda habarlasýdy ótindik. Sondyqtan, osyndaı jaǵdaı oryn aldy dep oılaımyn», - degen ákimdik ókili turǵyndardyń jeke praktıkadaǵy dárigerlerdiń kómegine kóp júginýi jaǵdaıdy ýshyqtyrǵanyn atady.

«Turǵyndardyń ózderi emhanaǵa barmaı, ózdiginen emdelý saldarynan syrqaty koronavıýrs pnevmonııasyna aınalyp ketken jaǵdaılar boldy. Ókinishke qaraı, bizde aýyr jaǵdaımen túsken naýqastardyń kóbi on besinshi, on altynshy, tipti jıyrmasynshy kúni biraq medıtsına kómegine júginedi. Olar osyndaı jeke praktıkadaǵy dárigerlerden dári-dármek alyp, bir emes, eki kýrs em qabyldaǵan. Onyń ishinde aýyr-aýyr antıbıotıkter bar. Sonymen emdelip, túk bolmaǵan soń jedel járdemge habarlasyp, aýyr kúıde túsip jatqan naýqastar boldy. Sondyqtan bul jaǵdaı qaıtalanbas úshin aldaǵy ýaqytta densaýlyq saqtaý salasynda medıtsınalyq aǵartý jumystaryn kúsheıtýimiz kerek», - dedi Shyńǵys Muqan.