Shyńǵys Muqan: Shymkentte naýqastyń ottegi berilmeý saldarynan kóz jumǵany rastalǵan joq

NUR-SULTAN. QazAqparat – Shymkent qalasy ákiminiń birinshi orynbasary Shyńǵys Muqan Ortalyq kommýnıkatsııalar qyzmetinde qaladaǵy naýqastardyń biri ottegi der kezinde berilmeý saldarynan qaıtys bolǵany týraly aqparatty joqqa shyǵardy, dep habarlaıdy QazAqparat tilshisi.

Brıfıng barysynda BAQ ókilderi shymkenttik naýqastyń ottegi tapshylyǵynan qaıtys bolýy boıynsha qylmystyq is qozǵalǵany týraly saýal qoıdy. Qala ákiminiń birinshi orynbasary bul oqıǵany bastan-aıaq baqylaýda ustaǵanyn aıtady.

«Men bul máselemen áleýmettik jelige taraǵan boıda aınalystym. Bul mekemeniń basshysy búkil Shymkentti ottegimen qamtamasyz etýge jaýapty bolatyn. Bizde sol ýaqytta 25 ınfektsııalyq statsıonar boldy. Bul aqparat rastalmady. Meniń ózim arnaıy baryp kórdim. Onyń aldynda da kórgenmin. Bul statsıonar ottegimen tolyq qamtamasyz etilip turdy. Bizde Shymkent qalasynda úsh jerden ottegi alynyp turdy. Sonymen birge, byltyr 7 statsıonarda aldyn ala suıyq ottegi rezervýaryn ornatqanbyz. Syıymdylyǵy 8 tonnaǵa deıin barady. Bir ret toltyryp qoısa, qoldanylýyna baılanysty 7 kúnge deıin jetedi. Sondyqtan, osyndaı málimet shyqqanymen, ratsalmady», - degen ákimdik ókili keıin atalmysh statsıonardyń bas dárigeri aqparatta aty atalǵan adamdarmen sóılesip, ondaı jaǵdaıdyń bolmaǵanyn rastaǵanyn jetkizdi.

«Keıbir statsıonarda 50, keı statsıonarda 200 ottegi núktesi bar. Siz aıtyp otyrǵan statsıonarda 100-den astam núkte bar. Bir adamǵa ottegi barmaı qalýy múmkin emes. Sebebi ottegini jalǵaıtyn stansa bólek turady da, sol jerden ottegi ketkende 100 núkteniń bárine birdeı barady. Al eger ottegi taýsylyp qalǵan bolsa, núktege jalǵanǵan 100 adamǵa birdeı barmaı qalar edi. Sondyqtan bul aqparat rastalmady», - ded qala ákiminiń birinshi orynbasary.