Shyńǵys Aıtmatovtyń «Armanym Áselim» hıkaıasy Oralda sahnalandy
ORAL. QazAqparat - Oralda Shyńǵys Aıtmatovtyń «Armanym Áselim» atty týyndysy boıynsha H.Bókeeva atyndaǵy oblystyq qazaq drama teatrynda qoıylǵan spektakldiń premerasy boldy, dep habarlaıdy QazAqparat tilshisi.
Klassık jazýshynyń áıgili hıkaıasyn Qazaqstannyń halyq ártisi, Sh.Aıtmatov atyndaǵy halyqaralyq syılyqtyń laýreaty Talǵat Temenov sahnalady.
Atalmysh týyndy budan jarty ǵasyrdan astam ýaqyt buryn Ǵ.Músirepov atyndaǵy jasóspirimder men balalar teatrynda kóringen edi. Mine, osy shyǵarmany Talǵat Temenov búgingi kúnge laıyqtap «Qyzyl oramaldy shynarym» degen atpen qaıta qoıǵan bolatyn.
Bul joly batysqazaqstandyq kórermenderge syıǵa tartylǵan lırıkalyq drama barysynda jol boıynda tanysqan Ásel men kólik júrgizýshisi Іlııas bir-birine ǵashyq bolyp qalady. Aqyry Ásel ata-anasynyń ruqsatyn almastan, atastyrylǵan jigitine de qaramaı, Іlııasqa erip kete barady. Áıtse de araǵa Qadısha túsip, Іlııas ishkilikke salynady. Muny bilgen Ásel kishkentaı Samatyn qolyna ustap, jolǵa shyqqanda, egde júrgizýshi Baıtemirge kezigedi. Kezinde taý kóshkininiń kesirinen áıeli men qos balasynan aıyrylǵan meıirimdi Baıtemir Ásel men ulyn úıine panalatady. Aqyry bir jyldan keıin ekeýi úılenip tynady. Ózin jaqsy kórgen Qadıshamen qosh aıtysqan Іlııas kezdeısoq Baıtemirdiń úıine tap bolady. Alaıda bári de kesh edi. Spektakl kórermenderge mahabbatty baǵalaý kerektigin uqtyrady.
Іlııasty Jasqaırat Valıýllıev, Áseldi jańa esim Nurjııan Hasanova somdady. Sondaı-aq teatrdyń beldi ártisteri Nargız Shadyeva, Musaǵalı Bektenov, Gúljııan Shyntemirler de óz rolderin alyp shyqty.
«Uly jazýshynyń klassıkalyq týyndysyn kezinde jastanyp oqydyq. Sahnalanǵanyn, onda keıingige ańyz bolǵan óner tarlandarynyń oınaǵanyn kórdik. Búgin, mine, sol shyǵarmanyń Oralda qoıylýy tegin emes. Týǵan jerge taǵzym degen bar. Sonaý Naryn qumynda ata-babasynyń kindik qany tamǵan, qazir Qalıbek Qýanyshbaev atyndaǵy teatrda mańdaı terin sypyryp, eńbek etip júrgen Talǵat Temenovtiń bul osy eline jasaǵan tartýy dep bilemiz. Іlııas rolinde oınaǵan Jasqaıratqa qatty rıza boldym. Osyndaı talantty jastarymyz kóbeıe bersin. Ásel - Nurjııan áli jas, bolashaǵy alda dep oılaımyn», dedi premeraǵa qatysqan aqyn, Memlekettik syılyqtyń laýreaty Aqushtap Baqtygereeva.
Talǵat Temenov te Jasqaırat Valıýllıevpen birge Nurjııan Hasanovanyń tyrnaqaldy ónerin atap ótip, jas darynnyń áli de stýdent ekendigin jetkizdi.
Spektakl sońynda H.Bókeeva atyndaǵy Batys Qazaqstan oblystyq qazaq drama teatrynyń bir top qyzmetkerine «Mádenıet maıtalmany», «Óner salasynyń úzdigi» belgisi tabys etildi. Olardyń arasynda J.Valıýllıevtiń bolýy da zańdy edi.
