Shyńǵys Aıtmatovqa Ózbekstannyń halyq jazýshysy ataǵyn berý usynyldy
ASTANA. QazAqparat - Tashkentte qyrǵyz jazýshysy Shyńǵys Aıtmatovqa Ózbekstannyń halyq jazýshysy ataǵyn berý usynyldy, dep habarlaıdy Kabar.
Mundaı usynysty tanymal ózbek ádebıetshisi, «Manas» jyryn ózbek tiline aýdarýshy jáne zertteýshi, «Ózbekstan-Qyrǵyzstan» dostyq qoǵamynyń atqarýshy dırektory Zýhrıtdın Isamýtınov jasady.
«Adamzattyń rýhanı mádenıetin, ózbek kórkem ádebıetin damytýǵa, sondaı-aq álem halyqtary arasyndaǵy dostyqty nyǵaıtýǵa qosqan úlesi úshin Shyńǵys Aıtmatovqa «Ózbekstannyń halyq jazýshysy» ataǵyn berý ádil bolar edi», - dedi ol.
Prezıdent Shavkat Mırzıeev sáýirde uly jazýshy jáne qoǵam qaıratkeri Shyńǵys Aıtmatovtyń 90 jyldyǵyn Ózbekstanda atap ótý týraly qaýly qabyldaǵan bolatyn.
