Shyńǵa órmeleýshi Ásel Marlenova Olımpıadaǵa mektep zalynda jattyǵýda
ASTANA. QazAqparat - Shyńǵa órmeleýden jastar arasynda álem chempıonatynyń qola medal júldegeri, jastar arasynda Azııa chempıonatynyń tórt dúrkin jeńimpazy Ásel Marlenova úlken jetistikterge Astanadaǵy mektepterdiń birinde jattyǵyp, qol jetkizip otyr, dep habarlaıdy QazAqparat.
Ásel Qazaqstan tarıhynda shyńǵa órmeleýden jastar arasyndaǵy Álem birinshiliginde medal enshilegen tuńǵysh ári ázirge jalǵyz qyz. Álem chempıonaty 7-14 qarasha aralyǵynda Qytaıdyń Gýanchjoý qalasynda ótken bolatyn. Oǵan álemniń 42 memleketinen sportshylar qatysty. Doda barysynda sportshylar boýlderıng (orta bıiktiktegi qıyn trassa) boıynsha, sonymen qatar bıiktikke jáne jyldamdyqqa jarysty. Qazaqstandyq sportshy sońǵy saıysta júldeli boldy.
«Ásel Astananyń 65-shi mektebinde 12 metrlik shyńda daıyndalýda, al etalondy trassanyń bıiktigi 15 metr bolýy tıis. Ekinshiden, ol eki aýysymdyq mekteptiń sportzalynda daıyndalatyndyqtan, oǵan jattyǵýǵa yńǵaısyz. Biz álem birinshiligine daıyndalyp jatqan kezde, tolyqqandy 3-4 saǵattyq jattyǵýdy tek jeksenbi kúnderi ǵana ótkize aldyq. Ol kez kelgen saıystarǵa qatysa alady, ol ámbebap sportshy. Biraq bizde jaǵdaı joq. Bul ázirshe olımpıadalyq sport túrine enbegen. Sondyqtan oǵan stıpendııa berilmeıdi. Degenmen alda ótetin «Tokıo-2020» Olımpıadasyna shyńǵa órmeleý sporty engizildi. Ásel óziniń myqtylyǵy men turaqtylyǵy jaǵynan Qazaqstanda eń myqty shyńǵa órmeleýshi, sondyqtan ol Olımpıadaǵa qatysý úshin eńbektenýde», - deıdi onyń bapkeri Klara Slýtskaıa.
Onyń sózine qaraǵanda, Qazaqstanda balalar atalmysh sport túrine fızıologııalyq turǵyda kóp beıim keledi. Bul sportqa joǵary deńgeıde qarjylyq qoldaý kórsetilmese de, 2010 jyly Saıat Baqanov jastar arasynda álem chempıony atandy. Al 2013 jyly shymkenttik Tamara Kýznetsova eresekter arasynda álem chempıonatynda «qola» enshiledi. 2012 jyly astanalyq Ámir Maımuratov jastar arasynda Eýropa Kýbogin jeńip aldy.
«Súıekteri jeńil, ushqyr, jyldamdyqtary óte joǵary. Qarjylyq jaǵyna toqtalsaq, Astanada jylyna eki márte Azııa jáne Álem birinishilikterine «Jiger» sport klýby men qalalyq sport basqaramasy qarjy bóledi. Álem Kýbogi jolyndaǵy jarystarǵa qarjy óte sırek beriledi. Biraq bizne jaqynarada kóńil bóline bastaıdy degen úmittemiz. Balalarymyz óte talantty, eldiń 8 óńirinde shyńǵa órmeleý sporty damyp jatyr. Joǵary deńgeıdegi sportshylar Astanada, Almatyda, Qaraǵandyda jáne Shymkentte bar», - dedi K.Slýtskaıa.
