Shyndyqqa shimirikpeı qaraǵan basshy ǵana qıyndyqty eńsere alady - Svetqalı Nurjan

NUR-SULTAN. QazAqparat - Aqyn Svetqalı Nurjan eldegi pandemııamen kúres jaǵdaıyna qatysty pikir bildirdi. QazAqparat aqynnyń Egemen Qazaqstan gazetinde jaryq kórgen maqalasyn nazarlaryńyzǵa usynady.

Jýyrda el basshysy Qasym-Jomart Kemeluly Toqaev tıisti oryndarǵa jandaryń shyǵyp ketse de, tájvırýs pen pnevmonııanyń statıstıkasyn biriktirińder dep pármen beripti. Mine, bul jańa bılikten biz kútken jaqsy jańalyq. Shyndyqqa shimirikpeı qaraǵan basshy ǵana qıyndyqty eńsere alady.

Meniń bilýimshe, Toqaev – qoly taza adam. Jany, ary taza, antyna adal adamdardyń ǵana qoly taza bolady. Osynsha batpaqty keship júrip, dilin, qolyn bylǵamaǵan sondaı adam­nyń bizge basshy bolyp kelýiniń ózi qazaqqa Alla taǵalanyń oń nazaryn salǵa­nynyń basy dep bilemin.

Kim ne dese, o desin, bul meniń óz paıymym! Meniń de eshkimge jaǵynyp, tilenip ómir ótkizbegenimdi elim, tipti bolmasa, Jaratýshy Iem biledi! Burynnan siresip tońǵan toń men syńysyp qalǵan seńdi qozǵaý ońaı emes. Bul nardy jyǵyp, pildi búgip keterlik asa aýyr is! Odan eldiń birligi men erdiń tirligi ǵana qutqarady. Sol jolda mynaý tyǵyryq haldi, el kóńiliniń alańyn, qoǵamnyń aýanyn paıdalanyp arzan ataq alyp qalýǵa umtylýdy toqtatqanymyz jón!

Ár jerden áýlikpeı, júmilaǵa tóngen qasiretti Allanyń sy­na­ǵy, tipti kerek dese, bizdi táý­bege shaqyrǵan meıirimi dep qa­byl­dap, nıetimizdi túzeıik! Duǵa­myzdy dýaly aýyzdan shy­ǵaraıyq! Birjúrektilikke jetsek, biz jeńbeıtin indet joq. Bul – burynǵy din de, búgingi ǵylym da dáleldep otyrǵan aqıqat!

Sondyqtan qıyn da syndarly kezeńde el bolyp el basshysyna járdemdeseıik! Toqaevtyń janynda toqaılasaıyq! Sanam­dy san sapyryp meniń tapqan aqylym – osy!

Svetqalı Nurjan,

aqyn, «Qurmet» ordeniniń ıegeri