«Shyn júrekten!» qaıyrymdylyq telemarafony kúzgi televızııalyq maýsymda qaıta jalǵasyn tabady

ASTANA. QazAqparat - Búgin «Qazmedıa ortalyǵynda» «Qazaqstan» Ulttyq arnasynan úsh kún boıy tikeleı efırde kórsetilgen «Shyn júrekten!» qaıyrymdylyq telemarafonynyń alǵashqy qorytyndysyna arnalǵan brıfıng ótti.

Bul týraly «Qazaqstan» RTRK» baspasóz qyzmeti habarlady.

Baspasóz máslıhatyna «Qazaqstan» RTRK» AQ basqarma tóraıymy Nurjan Muhamedjanova, «Qazaqstan halqy Assambleıasy qory» qoǵamdyq qorynyń basshysy Talǵat Balpyshev jáne QHA hatshylyǵynyń sektor meńgerýshisi Nazıpa Shanaı qatysty.

«Qaıyrymdylyq telemarafonynyń maqsaty kópshilikti áleýmettik jaǵdaıy tómen, múmkindigi shekteýli jandardy asyrap otyrǵan otbasylardyń jaǵdaıynan habardar etip, kómek qolyn sozýǵa shaqyrý bolatyn. Ulttyq arna ujymynyń shyǵarmashylyq ıdeıa retinde usynǵan bastamasy Qazaqstan halqy Assambleıasy tarapynan qoldaý taýyp, úlken birlesken joba retinde júzege asty. Telemarafon ótken úsh kúnniń ishinde biz qanshama kómekke muqtaj jandardy, tıisinshe olarǵa qolushyn sozýǵa ázir adamdardyń da kóp ekenine kóz jetkizdik. Bul - qaıyrymdylyqtyń úlken kórinisi», * dedi Qazaqstan» RTRK» AQ basqarma tóraıymy.

Sondaı-aq, N.Muhamedjanova óz sózinde jobanyń kúzgi televızııalyq maýsymda qaıta jalǵasyn tabatynyn atap ótti.

Baspasóz máslıhaty barysynda úsh kún ishinde respýblıka boıynsha qoǵamdyq qor esepshotyna 30 mıllıon teńge aýdarý týraly kelisimder bolǵany, sonymen qatar, muqtaj jandarǵa 15 mıllıon teńge qarajat kóleminde túrli qyzmetter men zattaı kómek kórsetilgeni atalyp ótti.

QHA ókilderiniń aıtýynsha, kelip túsken 1000-nan astam ótinishtiń ishinde aımaqtardan áleýmettik máseleler boıynsha quqyqtyq suraqtar, úı bólý máseleleri boıynsha saýaldar bolǵan. Onyń barlyǵy jınaqtalyp, jergilikti atqarýshy organdarǵa joldandy.

«18 jasqa deıingi balalardyń densaýlyǵyna qatysty 213 hat kelip túsken bolatyn. Sonyń 201-in jergilikti jerlerde sheshý múmkindigi bar ekeni anyqtaldy. 12-ine QHA janynan qurylǵan qoǵamdyq qordan qarajat aýdarylatyn bolady. Qazirgi kezde «Asyl bala» qaýymdastyǵymen birlesip, shuǵyl kómek kórsetilýi tıis balalardyń tizimi jasalyp, qarajat aýdarylýda», dedi QHA hatshylyǵynyń sektor meńgerýshisi óz sózinde.

«Qaıyrymdylyq sharasyna kóńil bólip, úles qosqan azamattardyń barlyǵyna alǵys bildiremiz. Janashyrlyq tanytyp, qolushyn sozǵan jandardyń arasynda zeınetkerler de boldy. Bul - bizdiń qoǵamnyń rýhanı óskendiginiń kórinisi», dep atap ótti N.Shanaı.