Shyn máninde, biz el damýyndaǵy jańa kezeńge qadam basyp otyrmyz – Máýlen Áshimbaev

NUR-SULTAN. QazAqparat - Shyn máninde, biz el damýyndaǵy jańa kezeńge qadam basyp otyrmyz. Basty maqsat – memlekettiligimiz ben Táýelsizdigimizdi nyǵaıtý, zań ústemdigi saltanat qurǵan ádiletti Qazaqstan qurý jáne azamattarymyzdyń áleýmettik jaǵdaıyn jaqsartý.

Bul pikirdi búgin QR Parlamenti Senatynyń tóraǵasy Máýlen Áshimbaev óziniń Facebook paraqshasynda jazdy, dep habarlaıdy QazAqparat.

«Jalpyulttyq referendýmnyń aldyn ala qorytyndysy jarııalandy. Sonyń nátıjesi boıynsha daýys berýge quqyly azamattarymyzdyń 68 paıyzy referendýmǵa qatysqan. Olardyń 77,18 paıyzy Konstıtýtsııaǵa engizý úshin usynylǵan ózgeristerdi qoldap daýys berdi. Osylaısha, halyq óz tańdaýyn jasap, Memleket basshysy Qasym-Jomart Kemeluly Toqaevqa jáne Jańa Qazaqstan qurý jolyndaǵy bastamalarǵa qoldaý bildirdi»,-dep jazdy Senat tóraǵasy.

Onyń sózinshe, bul demokratııalyq, quqyqtyq, ádiletti memleket bolýǵa bet burǵan elimiz úshin eń mańyzdy jáne sheshýshi qadam ekeni sózsiz. Endigi mindet – eldiń osy qalaýyn iske asyrý. ıAǵnı alda aýqymdy jumys kútip tur. Bul rette zańnamalyq baǵytta atqarylar istiń mańyzy zor. Sondyqtan Parlament Senaty qolǵa alynǵan saıası ózgeristerdi júzege asyrý úshin tıisti jumysty jalǵastyra beredi.

«Shyn máninde, biz el damýyndaǵy jańa kezeńge qadam basyp otyrmyz. Basty maqsat – memlekettiligimiz ben Táýelsizdigimizdi nyǵaıtý, zań ústemdigi saltanat qurǵan ádiletti Qazaqstan qurý jáne azamattarymyzdyń áleýmettik jaǵdaıyn jaqsartý. Oǵan negiz bolatyn mańyzdy sheshim qabyldandy. Aldaǵy ýaqytta da ult bolyp jumylyp, kózdegen maqsattarymyzǵa qol jetkizemiz dep senemin»,-dedi Máýlen Áshimbaev.