Shyn ǵalymnyń baqyty kózi tirisinde emes dúnıeden ozǵan soń ashylady - H. Ábjanov
ALMATY. 27 jeltoqsan. QazAqparat - Manash Qozybaev - ǵalymdarǵa baǵdarsham bolatyn uly tulǵa. Bul týraly búgin Almatyda Sh.Ýálıhanov atyndaǵy tarıh jáne etnologııa ınstıtýty 2013 jyly jaryqqa shyǵarǵan birneshe kitaptyń tusaýkeserinde aıtyldy.
«Menińshe, shyn ǵalymnyń baqyty kózi tirisinde emes, dúnıeden ozǵan soń ashylady. Manash Qozybaevtyń 7 tomdyǵynyń shyǵýy, esiminiń ýnıversıtetke berilýi, Almatyda oıyp turyp úlken kósheniń onyń atymen atalýy ǵalymnyń ǵylymdaǵy eńbeginiń ótelýi. Óıtkeni kózi tirisinde eldiń bári syıly, bári jaqsy. Al ómirden ótkennen keıin osyndaı qurmetke ıe bolyp, tanymaldyqqa kóterilý bul endi qubylystyń qubylysy deýge bolady», - deıdi Sh.Ýálıhanov atyndaǵy tarıh jáne etnologııa ınstıtýtynyń dırektory, QR UǴA múshe-korrespondenti, tarıh ǵylymdarynyń doktory Hangeldi Ábjanov. Onyń aıtýynsha, Manash Qabashulynyń ekinshi qubylysy 2 márte memlekettik syılyqtyń ıegeri atanýy. Birinshisi memlekettik syılyq bolsa, ekinshisi - bıyldan bastap memlekettik mártebemen beriletin Prezıdenttik beıbitshilik jáne kelisim syılyǵy. Ol táýelsizdiktiń 10 jylynyń ishinde adal eńbegimen, jankeshtiligimen osyndaı bıikke kóterilip, bárimizge úlgi-ónege bolyp, baǵdarshamdaı tulǵaǵa aınaldy.
