Shymkenttiń «jumsaq kúshin» úlgi etken kitap jaryq kórdi
Týyndyda Qazaqstan qalalary men óńirlerine tán brenderdi tıimdi basqarý men ilgeriletýdiń joldary Shymkent qalasynyń mysalynda berilgen.
Kitap avtory – fılosof, PhD doktarant Abylaıhan Qalnazarov. Al tolyq ataýy – «Shymkenttiń jumsaq kúshi. Shymkent qalasynyń brendin tıimdi basqarý men ımıdj-ıdeologııasyn ilgeriletý boıynsha kommýnıkatıvtik strategııa (Taldaýlar men usynystar)».
Avtordyń aıtýynsha, bul analıtıkalyq-usynymdyq zertteý eńbek memlekettik qyzmette júrgen barlyq deńgeıdegi basshylar men ıdeologtarǵa nusqaýlyq-qoıyn kitapsha retinde ázirlengen.
Eńbektiń alǵashqy taralymy 100 dana bolmaq, 5 taraý, 432 betten turady. Teorııalyq bazasy Ulybrıtanııa úkimetiniń keńesshisi, Eýropa parlamentiniń depýtaty, aǵylshyn ǵalymy Saımon Anholt kontseptsııasyna negizdelgen.
«Bul ózi el ıdeologtary áli oıǵa da alyp úlgermegen tyń da aktýaldy joba. Eńbek úsh qabatty qamtyǵan. Birinshisi – brendtik-ımıdjdik, ekinshisi – ıdeologııalyq jáne úshinshisi – ulttyq qundylyqtar órisi. Tap mundaı basqarýshylyqqa arnalǵan jumystar bir ońtústik óńiri emes, elimizdiń ár aımaǵyna laıyqtalyp istelýge tıis. Olardyń jalpy jıynynan eldik aýqymdaǵy ortaq ıdeologııa somdalyp shyǵady. Abylaıhan baýyrymyz endi Respýblıka masshtabyndaǵy saıası-ekonomıkalyq týyndysyn dúnıege alyp kelse, nur ústine nur» dedi «Qazaqstan máslıhattary depýtattarynyń birlestigi» RQB tóraǵasy Tóleýbek Muqashev kitaptyń tusaýyp kesip turyp.
Avtordyń ózi kitap byltyr basylyp qoıǵanyn aıtady.
«Kitap byltyrǵy aqpanda daıyn bolǵan edi. Alaıda belgili bir sebeptermen araǵa 1 jyl salyp, endi ǵana tanystyrýdyń reti kelip otyr. Onyń súıegi «úshinshi megapolıs» atanǵan Shymkent qalasynyń brendin tıimdi basqarý men ımıdj-ıdeologııasyn ilgeriletý boıynsha kommýnıkatıvtik strategııa retinde tikeleı túzilgen. Dese de qazaq realııleriniń jalpyeldik aýqymda uqsastyǵyna oraı Astana, Almaty men Túrkistan ahýaldaryn salystyrý arqyly barlyq aımaqqa tán ishki problemalardy kóterip, tıimdi sheshimder usynyldy», - deıdi Abylaı Qalnazarov.
Buǵan deıin avtordyń «Balýan tas» atty eki tomdyq kitaby jaryq kórgen bolatyn.
