Shymkenttiń jedel járdem qyzmeti eki aılyq sábıdi ólim aýzynan aman alyp qaldy

ShYMKENT. QazAqparat - Shymkenttiń jedel járdem qyzmeti ólim aýzynan eki aılyq sábıdi aman alyp qaldy. Der kezinde júrgizilgen em-domnyń arqasynda náresteniń jaǵdaıy qalpyna túsip, aýrýhanaǵa jatqyzylǵan, dep habarlaıdy QazAqparat tilshisi.

Qalalyq jedel járdem qyzmetiniń málimetinshe, osy oqıǵa boıynsha  shaqyrtý kúndizgi saǵat 11:12-de tirkelgen. Eki aılyq sábıdiń týystary  onyń es-tússiz jatqanyn jetkizgen.

«Shaqyrtýdy  №17 brıgada qabyldap aldy. Olar naýqastyń  úıine jetip, sábıdiń jaǵdaıyn teksergen. Dárigerler balany qaraý  kezinde onyń esin joǵaltqanyn, júrek qaǵysy nasharlap ketkenin anyqtaǵan. Jedel túrde jan saqtaý sharalaryn jasaýdyń nátıjesinde 3 mınýttan keıin sábıdiń júrek qaǵysy qalpyna kelip, tynys ala bastaǵan. Naýqas bala qalalyq balalar aýrýhanasyna jetkizildi» delingen habarlamada.