Shymkenttiń jasyl beldeýine 3 mln-nan astam kóshetter otyrǵyzyldy
ASTANA. QazAqparat - Shymkenttiń 2475 gektar bolatyn jasyl beldeýine 3 mln 281 myń aǵash kóshetteri otyrǵyzyldy, dep habarlaıdy OQO ákimdiginiń baspasóz qyzmeti.
Jasyl jelekterdi egý men kútim jasaý jumysyn júrgizetin «Jasyl aımaq» kommýnaldyq mekemesi 2 248 ga jerge - 2 810 000 dana qaraǵash, 125 ga jerge - 416 600 dana terek, 52 ga jerge - 21 700 emen kóshetterin ekti. Sonymen qatar, munda 50 ga jerge 33 myńnan astam alma, alsha, shabdaly, almurt syndy birqatar jemis kóshetteri de otyrǵyzyldy.
«Jasyl aımaq» baǵdarlamasy aıasynda kóshet egý jumystary qalanyń tórt bóliginde júrgizildi. Olar - 1 700 ga alqapty alyp jatqan «Aıkól», 385 ga quraıtyn «Aqtas», aýmaǵy 300-ge jýyq gektar bolatyn «Bórjar» men 100 gektarlyq «Qaınarbulaq» ýchaskeleri.
Osyǵan deıin qaladaǵy 2 564 ga jerge aǵash kóshetteri egilip, nátıjesinde, jasyl aımaqtyń aýmaǵy 5 myń gektarǵa jetti. Otyrǵyzylǵan kóshetterdiń barlyǵy derlik jergilikti tálimbaqtardan alynyp otyr.
Aldaǵy ýaqytta kóshetterdi óńirde ósirý úshin arnaıy 20 gektar jerge tuqymbaq salynady. Onda qylqan japyraqty aǵash túrleri men aq qaıyń ósirý jáne basqada aǵash kóshetterin ósirý qolǵa alynady dep josparlanýda.
