Shymkenttiń tórt kóshesinde «Arbat» ashylmaq
ShYMKENT. QazAqparat - Shymkent qalasyndaǵy birqatar kóshelerdi jumysshy toppen aralap shyqqan oblys ákimi Ońtústik Qazaqstan oblysynyń ákimi Janseıit Túımebaev qaı kóshelerde mádenı demalys orny bolatynyn aıtty, dep habarlaıdy QazAqparat tilshisi.
Túrli óner adamdarynyń basyn qosatyn mádenı demalys orny endi shahardaǵy Qoshqar ata boıy men Beket batyr, Asqarov jáne Beıbitshilik kósheleriniń boıynda ornalaspaq. Búginde atalǵan kóshelerdegi arbattyń jobasy jasalyp, aımaq basshysyna usynylǵan. Sonymen qatar, búgingi jumysshy top quramyndaǵy oblys máslıhatynyń depýtaty Ómirzaq Meldehanov atalǵan joba boıynsha óziniń birqatar usynystaryn jetkizdi.
Sapary barysynda oblys ákimi atalǵan kóshe boıyndaǵy turǵyndarmen tildesip, sol kóshede uıymdastyrylatyn «Arbat» demalys orny týraly pikirlerin tyńdady. Sondaı-aq ákim bul jobany júzege asyrýdyń basty maqsaty ulttyq qundylyqtardy dáripteı otyryp, turǵyndardyń qazaq halqynyń dástúri men tarıhyna degen qyzyǵýshylyǵyn oıatý ekenin atap ótti.
Aıta keteıik, mundaı ashyq aspan astyndaǵy kórmeni qolǵa alý ıdeıasyn óńir basshysy Janseıit Túımebaev kóterip, ony júzege asyrýdy qala ákimdigine tapsyrǵan bolatyn. Osylaısha, taıaý kúnderi qala ortalyǵynan Shymkenttiń óz «Arbaty» paıda bolyp, onda shahar turǵyndary men qonaqtary jeksenbi jáne mereke kúnderi sýretshilerdiń kórmesin, kádesyılardyń alýan túrlerin tamashalaı alatyn bolady.
