Shymkenttiń tigin fabrıkasy 1,5 mln-ǵa jýyq ónimin eksportqa shyǵarady

ShYMKENT. QazAqparat – Shymkenttiń «AGF Grýpp» tigin fabrıkasy reseılik IKEA kompanııasynyń dúkenderine tósek jabdyqtaryn tigýde. Jeńil ónerkásip salasynda 10 jyldan asa tabys taýyp júrgen kompanııa jylyna 1,5 mıllıonǵa jýyq ónimin eksportqa shyǵarady, dep habarlaıdy QazAqparat tilshisi.

Fabrıka «Ońtústik» arnaıy ekonomıkalyq aımaǵynda ornalasqan. 2013 jyly óz ónimderin eksporttaı bastaǵan kompanııa jasandy emes matalar jáne tabıǵı materıaldarmen kombınezon, mektep formasy, áskerı kıimder men halattar tigedi. Aımaqta tósek oryndyqtar men tósenishter, jastyqtar men kórpeler, qaptósekter óndiretin eń iri ónerkásiptik tigin fabrıkasy sanalady.

Kásiporynda zamanaýı úlgidegi tigin mashınalary men japon jáne álemdik brendterdiń útikteý jáne kesý jabdyqtary bar. Qazirgi ýaqytta kompanııany eksportqa baǵdarlanǵan dep ataýǵa bolady. Sebebi, óndirilgen ónimderdiń 90% sheteldik tutynýshylarǵa joldanady. Elimizde tótenshe jaǵdaı jarııalanyp, karantın rejımi engizilgen soń maskaǵa tapshylyqty sezgen kásiporyn betperde tigýmen aınalysqan.

Sonymen qatar, karantınge jabylǵan turǵyndarǵa 3 myńnan asa maskany tegin taratqan. Tigin fabrıkasynyń basshysy Gaýhar Nasyrovanyń aıtýynsha, kompanııanyń jumysy negizinen tósek-oryn jabdyqtary men kıimder shyǵarýǵa baǵyttalǵan.

Al, ótken jyly fabrıka «Qazaqstannyń úzdik taýary» kórme-baıqaýynda «Halyqqa arnalǵan úzdik taýarlar» nomınatsııasyn jeńip alǵan bolatyn.